Президент Жолдауында ғылым мен инновацияны дамытуға ерекше мән берілді. Өйткені елдің ұзақ мерзімді бәсекеге қабілеттілігі тек білімді ұрпақпен ғана емес, заманауи технологияларды меңгерген ғалымдар мен кәсіпкерлер буынымен айқындалады.
Қазақстанда ғылыми экожүйені қалыптастыру бағытында ірі қадамдар жасалуда. Зерттеу университеттерінің саны артып, Ұлттық Ғылым академиясы мен Ғылым және технологиялар жөніндегі ұлттық кеңес құрылды. Ғалымдардың жалақысы мен ғылыми атақтарға төленетін үстемеақы көбейтілді. Ғылымды қаржыландыру көлемі 3,3 есеге артып, жас ғалымдарға 1000-ға жуық жоба берілді.
Жасанды интеллект саласында «AI-Sana» бағдарламасы жүзеге асырылуда. 390 мыңнан астам студент пен 3 мың оқытушы жасанды интеллект негіздері бойынша курстан өтті. Назарбаев Университеті мен бірқатар жетекші ЖОО базасында қуатты суперкомпьютерлік кластер құрылып жатыр. Қазақстандық студенттер 119 жасанды интеллект агентін жасап, тағы 395 жоба әзірлеуде.
Шетелдік университеттердің 24 филиалы ашылып, 2025 жылға дейін тағы 10 жаңа кампус жұмысын бастайды. Қазақстандық ЖОО-лар да шетелде филиалдарын кеңейтіп келеді. Бұл елдің білім кеңістігін халықаралық деңгейге шығаруда.
Шымкент қаласы ғылым мен инновация саласында да белсенді дамып келеді. М.Әуезов атындағы университет халықаралық ғылыми-зерттеу орталықтарымен ынтымақтастық орнатуда. Қалада соңғы бес жылда ғылыми жобаларды қаржыландыру көлемі үш есеге өсіп, жас ғалымдардың 200-ден астам стартап-жобасы іске қосылды. 2024 жылы шымкенттік студенттер халықаралық стартап байқауларында 50-ден астам жүлделі орынға ие болды.
Бұл бастамалар Қазақстанды аймақтық ғылыми-білім беру хабына айналдыруға бағытталған. Жастардың жаңа идеялары мен ғылыми ізденістері елдің өркениет өрісін кеңейтіп, инновациялық болашағын айқындауда.
