Елімізде энергетика және коммуналдық секторларды жаңғыртуға бағытталған ұлттық жоба жүзеге асырылуда. Мемлекет басшысының тапсырмасына сәйкес, инфрақұрылымдағы негізгі проблемаларды шешу үшін кешенді шаралар қолға алынды. Жоба апатты жағдайларды азайтып, тозған желілерді жаңарту және жаңа энергия көздерін енгізу арқылы тұрақты дамуды қамтамасыз етуді көздейді. ҚР ҰЭМ Табиғи монополияларды реттеу комитетінің төрағасы Тимур Қосымбаевтың айтуынша, инженерлік желілердің сенімділігін арттыру – басты міндеттердің бірі.
Қолданыстағы деректерге сүйенсек, жылу, электр және сумен жабдықтау жүйелерінің тозу деңгейін төмендету үшін 6,8 трлн теңгеден астам қаржы қажет. Бұл қаражат 86 мың шақырым желіні қайта жаңғыртуға жұмсалады. Монополистік ұйымдар арасында тозу деңгейі аса жоғары кәсіпорындар көп. Мысалы, жылумен жабдықтау саласында 22 кәсіпорында тозу 65%-дан жоғары, олардың көпшілігі шығыс және орталық өңірлерде шоғырланған. Электр желілері бойынша да жағдай күрделі: 18 кәсіпорынның желілері 70%-дан артық тозған. Сумен жабдықтау бағытында да едәуір қауіп бар, мекемелердің жартысына жуығы 70%-дан астам тозуға жеткен.
Жыл сайынғы табиғи тозу 2-3% шамасында, бұл орта есеппен 5 мың шақырымға жуық желінің сапасыздануын білдіреді. Осыған байланысты 2025 жылға қарай 1 347 шақырым желіні және 3 047 жабдықты ауыстыру жоспарланды. Бұл жұмыстарға қаржыландыру толықтай дайындалып, 48 табиғи монополия субъектісі белгіленді.
Шымкент қаласы үшін бұл бастама ерекше маңызды. Себебі үшінші мегаполисте халық саны қарқынды өсіп келеді, ал коммуналдық желілердің басым бөлігі өткен ғасырдың ортасында салынған. Әсіресе жылумен қамту жүйесі мен сумен жабдықтау инфрақұрылымы жиі апатты жағдайларға ұшырайды. Ұлттық жоба аясында Шымкентте 2025 жылға дейін 50 шақырымнан астам жылу желісін, 30-ға жуық су жүйесін жаңарту және жаңа электр қосалқы станцияларын салу жоспарлануда. Бұл шаралар қаланың индустриялық аймақтарын дамытуға, жаңа тұрғын үй кешендерін сапалы инфрақұрылыммен қамтуға және жалпы халықтың тұрмыс деңгейін көтеруге ықпал етпек.
