Бүгін Мұхамед Хайдар Дулати атындағы үш тілде оқытатын №8 мамандандырылған гимназияда «Жастар арасындағы буллинг пен сталкинг: қауіп пен жауапкершілік» тақырыбында жастармен мазмұнды кездесу өтті.
Іс-шараның мақсаты – жасөспірімдер арасында буллинг пен сталкингтің алдын алу, аталған құқықбұзушылықтардың психологиялық және құқықтық салдарын түсіндіру, сондай-ақ білім беру ұйымдарында қауіпсіз әрі қолайлы орта қалыптастырудағы жеке жауапкершілікті арттыру.Іс-шараға арнайы Шымкент қалалық Аналар кеңесінің төрайымы, тарих ғылымдарының кандидаты, профессор Гүлжан Сүгірбаева, ҚР Президентінің «Болашақ» халықаралық стипендиясының иегері, психолог, арт-терапевт, Өзбекәлі Жәнібеков атындағы Оңтүстік Қазақстан педагогикалық университеті жанындағы «Психологиялық қолдау» орталығының басшысы Гульнара Айтжанова, №8 мектеп-гимназиясының директоры, Шымкент қалалық Аналар кеңесі мүшесі Айнұр Сахова және мектеп жастары қатысты.«Жастар арасындағы кез келген қысым көрсету әрекеті – бұл тек жеке адамның мәселесі емес, тұтас қоғамның қауіпсіздігіне әсер ететін фактор. Сондықтан әрбір жас өз әрекетінің салдарын түсініп, заң мен адамгершілік қағидаттарын басшылыққа алуы тиіс», – Гүлжан Дәулетбекқызы.Кездесу аясында сталкинг мәселесіне арналған 5 минуттық бейнеролик көрсетіліп, оның мазмұны бойынша кең көлемде талқылау жүргізілді. Сондай-ақ мамандар жастармен ашық диалог форматында пікір алмасып, жастардың сауалдарына жауап берді.