Аймақтық Инновациялық Университетінде Қазақстан халқы Ассамблеясы жанындағы этномәдени бірлестіктер мен университеттің студенттік ассамблея мүшелерінің қатысуымен мазмұнды кездесу ұйымдастырылды. Іс-шараның басты мақсаты – жастар арасында қоғамдық келісім мен жалпыұлттық бірлік құндылықтарын насихаттау, этносаралық өзара түсіністікті нығайту және тәжірибе алмасу.
Кездесуге этномәдени бірлестіктердің өкілдері, жоғары оқу орнының профессор-оқытушылар құрамы, студенттік жастар және университет басшылығы қатысты. Шара барысында қоғамдағы тұрақтылықты сақтау, бейбітшілік пен татулықты нығайтудағы жастардың рөлі кеңінен талқыланды.
Сонымен қатар, «Ахыска» түрік этномәдени бірлестігінің өкілі Мейрамбек Оспанов этномәдени бірлестіктердің қоғамдық келісімді сақтау бағытындағы қызметі туралы баяндап, өзара сыйластық пен мәдени әралуандылықты сақтау – ел тұрақтылығының негізгі факторы екенін жеткізді.
Кездесу барысында профессор Мұрат Арман мен университет студенті Қарлығаш Джумабек жастардың қоғамдық келісімді нығайтуға қосар үлесі, патриоттық сана мен белсенді азаматтық ұстаным қалыптастыру мәселелері жөнінде ой бөлісті.
Іс-шара соңында тәрбие және әлеуметтік істер жөніндегі проректор Даурен Керимбаев қорытынды сөз сөйлеп, студенттерді қоғамдық бастамаларға белсенді қатысуға, достық пен бірлікті қадірлеуге шақырды.
