ҚР Парламенті Мәжілісінің депутаты Болатбек Нажметдинұлы Шымкент қаласына жұмыс сапарымен келіп, бірқатар әлеуметтік нысандарды аралады. Іссапар барысында депутат А.Бөкейханов атындағы №2 жалпы орта мектебінің жағдайымен танысып, білім ордасындағы өзекті мәселелерге назар аударды.
Кездесуге Шымкент қаласы әкімінің орынбасары Сәрсен Құранбек, «AMANAT» партиясы Шымкент қалалық филиалы атқарушы хатшысының орынбасары Ербол Байқонысов, фракция жетекшісі, мәслихат депутаты Байкен Әшірбаев және Білім басқармасының басшысы Қуаныш Ысқақов қатысты.
Басқосу барысында мектеп директоры Радагүл Ибраева ғимараттың әбден ескіргенін айтып, оны жаңарту қажеттігін көтерді. Оның сөзінше, арнайы мамандар мектеп ғимаратының жаңартуға жататыны жөнінде тиісті қорытынды берген.
Өз кезегінде қала әкімінің орынбасары Сәрсен Құранбек мектеп ғимаратының тозығы жеткенін атап өтті.
«Жаңа ғимарат салуға талапқа сай жер көлемінің жетіспеушілігі бар. Дегенмен, мектепті күрделі жөндеуден өткізуге толық мүмкіндік қарастырылып отыр», – деді ол.
Мәжіліс депутаты Болатбек Нажметдинұлы мәселені заң аясында қарау қажеттігін айтып, егер жаңа ғимарат салуға жер тапшылығы кедергі келтірсе, жөндеу жұмыстарын жүзеге асыру керектігін тапсырды.
«Ең бастысы – оқушылардың қауіпсіздігі мен сапалы білім алуына жағдай жасау. Сондықтан бұл мәселе кешенді түрде шешілуі тиіс», – деді депутат.
Айта кетейік, А.Бөкейханов атындағы №2 жалпы орта мектебінің іргетасы 1958 жылы қаланған. Соңғы рет 2011 жылы шатыр мен терезелері ауыстырылып, күрделі жөндеу жұмыстары жүргізілген. Қазіргі таңда мектепте 700-ден астам оқушы білім алады. Ал ғимараттың жобалық қуаттылығы 530 орынға шақталған.
#AMANAT
