Қазақ халқының терең тарихына үңілсек, мемлекет тұтастығын сақтап, болашаққа нық қадам басудың кілті әрдайым бірлік пен өзара құрметтен бастау алғанын көреміз. «Бірлік бар жерде тірлік бар» деген даналық сөз ғасырлар бойы ұрпақ санасына бағыт-бағдар беріп, халықты бір мақсатқа ұйыстырған рухани тірекке айналды.
Кең-байтақ қазақ даласы қилы замандарды басынан өткергенімен, осы жолда көптеген тағдырларды тоғыстырды. Түрлі кезеңдерде бұл өлкеге әр тараптан келген талай жан осы жерден пана тауып, жаңа өмірге үміт артты. Сол кезеңдерде қазақ халқы кеңпейілділік қасиетімен әрбір адамды бауырына тартып, мейірім мен қамқорлық көрсетті. Осындай адамгершілікке толы дәстүрдің арқасында ел ішінде сенімге негізделген достық қалыптасып, бүгінгі тұрақтылықтың мызғымас іргетасы бекіді.
Қазіргі Қазақстан – әр түрлі мәдениет өкілдері тату өмір сүріп, ортақ Отанның өркендеуіне үлес қосып отырған бірегей орта. Мұнда әр халық өзінің тілін, дәстүрін, мәдениетін сақтай отырып, ел дамуының ортақ мақсатына жұмылады. Бұл – халқымыздың кең жүрегінің, сондай-ақ мемлекет жүргізіп отырған сарабдал саясаттың нақты нәтижесі.
Татулық пен өзара үйлесім – ел дамуының негізгі қозғаушы күші. Ынтымақ салтанат құрған қоғамда бейбіт өмір орнығып, елдің әлеуетін арттыруға бағытталған бастамалар тезірек жүзеге асады. Тұрақтылық бар жерде экономика да өседі, мәдениет те дамиды, білім беру мен инновация да жаңа деңгейге көтеріледі.
Бүгінде Қазақстан халықаралық аренада бейбітшілік, келісім және сенім құндылықтарын насихаттайтын ел ретінде танылып отыр. Ел ішіндегі татулық – сыртқы саясаттағы беделіміздің мықты тірегі. Достық – жүректерді жақындастыратын алтын көпір болса, татулық – мемлекеттің берік негізі.
Сондықтан ынтымақты сақтау – тек мемлекеттік институттардың ғана емес, әрбір азаматтың азаматтық борышы. Бұл – өткеннен қалған аманат, бүгінгі міндет, болашаққа жеткізер мәңгілік құндылық. #МыВместе #PeaceAndHarmony #PeaceForAll #TogetherForPeace #ҚХА30жыл #АНК30лет #APK30years #АНК #ANK
