25 қазан – Республика күні – қазақ халқының тарихындағы ең маңызды және тағылымды күндердің бірі. Бұл күн – еліміздің егемендігі мен тәуелсіздігін айқындайтын, мемлекеттілік негізін қалаған ұлы белес. 1990 жылы дәл осы күні Қазақ Кеңестік Социалистік Республикасының мемлекеттік егемендігі туралы Декларация қабылданып, Қазақстан өз тағдырын өзі айқындайтын дербес мемлекет ретінде жаңа дәуірге қадам басты. Бұл тарихи құжат еліміздің болашақ тәуелсіздігіне жол ашып, ұлттық сана мен рухтың жаңғыруына серпін берді. Ал 2022 жылдан бастап Республика күні ұлттық мереке ретінде қайта жаңғыртылып, халқымыздың азаттығын ұлықтайтын жалпыхалықтық мейрамға айналды.
Республика күні – әр қазақстандықтың жүрегінде еркіндік пен елдік рухты асқақтататын ерекше мереке. Бұл күн – азаттық үшін күрескен ата-бабаларымыздың арманының жүзеге асқан символы, ел бірлігі мен татулықтың, ұлттың жаңғыруының айғағы. Бүгінде Қазақстан – бейбітшілік пен тұрақтылықтың, өрлеу мен өркендеудің мекені. Егемендік алғаннан бергі отыз жылдан астам уақытта еліміз саяси тұрақтылықты сақтап, экономикалық және әлеуметтік даму жолында айтарлықтай жетістіктерге жетті. Білім мен ғылым, технология мен мәдениет салаларында жаңа белестер бағындырылып, халықаралық беделіміз арта түсті. Мұның барлығы – елін сүйген, еңбегі мен парасатын туған жерінің дамуына арнаған азаматтардың қажырлы еңбегінің нәтижесі.
Өзбекәлі Жәнібеков атындағы Оңтүстік Қазақстан педагогикалық университеті – осы жетістіктерге өз үлесін қосып келе жатқан білім ордаларының бірі. Университет ел болашағы саналатын жастарды жан-жақты дамыған, рухани бай және отансүйгіш азамат ретінде тәрбиелеуге бағытталған маңызды миссия атқарады. Біздің басты мақсатымыз – сапалы білім мен жоғары адамгершілік құндылықтарды ұштастыра отырып, ұлттың зияткерлік әлеуетін арттыру. Университет ұстаздары мен студенттері ұлт зиялысы Өзбекәлі Жәнібековтің елжандылық, мәдени мұраға құрмет және ұрпаққа үлгі болу идеяларын басшылыққа алып, сол рухты бүгінгі ұрпақ санасына сіңіруде.
Педагогикалық университет – тек білім ордасы ғана емес, мәдениет пен руханияттың, ғылым мен жаңашылдықтың тоғысқан орталығы. Мұнда жастардың шығармашылық қабілеттерін дамытуға, ғылыми зерттеу жұмыстарына және ұлттық құндылықтарды дәріптеуге ерекше көңіл бөлінеді. Әрбір студент – ертеңгі тәуелсіз Қазақстанның тірегі, ел дамуының негізгі күші. Сондықтан білім беру сапасын арттыру, ұстаз мәртебесін көтеру және жаңа педагогикалық технологияларды енгізу – біздің басты басымдығымыз.
Республика күні – елді бірлікке, татулыққа, ортақ мақсатқа жетелеуші мереке. Бұл күн әр азаматқа өз елінің азаттығы мен тәуелсіздігі үшін мақтаныш сезімін ұялатып, туған жерге деген сүйіспеншілікті арттыра түседі. Егемендік бізге бейбіт өмір мен дамуға мүмкіндік сыйлады, енді оны сақтау мен нығайту – баршамыздың қасиетті борышымыз.
Бүгінгі мереке аясында біз өз тарихымызды еске алып, өткеннің тағылымынан сабақ аламыз. Республика күні – болашаққа деген сенімнің, ел бірлігінің және рухани жаңғырудың мерекесі. Осы ұлы күнде барша қазақстандықтарға бейбіт өмір, береке-бірлік, еліміздің гүлденуіне бағытталған жаңа табыстар тілеймін!
Өзбекәлі Жәнібеков атындағы ОҚПУ
Басқарма төрағасы-ректор міндетін атқарушы
Әлібек Нұртаев
