Шымкент қаласында денсаулық сақтау саласының дамуына ерекше мән беріліп келеді. Соның айқын дәлелі – жергілікті медицина мамандарының кәсіби біліктілігін шетелдің жетекші клиникаларында арттыруға арналған жүйелі жұмыс. Қазіргі таңда Шымкент қалалық денсаулық сақтау басқармасына қарасты медициналық ұйымдардың 19 қызметкері Ресей Федерациясының беделді жоғары оқу орындарының бірі – Н.И. Пирогов атындағы Ресей ұлттық зерттеу медициналық университетінің клиникалық базасында біліктілігін арттыруда.
Біліктілік арттыру бағдарламасы аясында шымкенттік дәрігерлер неонаталды хирургия, балалар хирургиясы және эндоскопиялық оталар сынды заманауи медицинаның аса маңызды бағыттарын терең меңгеріп жатыр. Бұл курстар дәрігерлердің кәсіби деңгейін көтеріп қана қоймай, жаңа технологияларды қолдану тәжірибесін арттырып, науқастарға көрсетілетін медициналық көмектің сапасын жақсартуға мүмкіндік береді.
Оқыту бағдарламасында дәрігерлер теориялық біліммен қатар тәжірибелік сабақтарға да қатысады. Олар әлемдік стандарттарға сай операция жүргізу әдістерін үйреніп, нақты клиникалық жағдайларда тәжірибе жинақтауда. Бұл өз кезегінде қала тұрғындарына жоғары сапалы және қауіпсіз медициналық қызмет көрсетуге жол ашады.
Халықаралық тәжірибе алмасу жұмысы мұнымен шектелмейді. Жыл соңына дейін тағы 33 шымкенттік маман Литва мен Беларусь мемлекеттерінің жетекші клиникалық орталықтарында оқудан өтеді деп жоспарланып отыр. Олар акушерліктегі шұғыл көмек, акушерлік-гинекология саласындағы ультрадыбыстық диагностика, онкологиялық патологиядағы паллиативті көмек және торакалды хирургия сияқты бағыттарда білім алады. Бұл курстар аймақтық денсаулық сақтау жүйесінде кадрлық әлеуетті арттырып, жаңа әдістерді күнделікті тәжірибеге енгізуге мүмкіндік береді.
Айта кетейік, мұндай бастама алғаш рет қолға алынған жоқ. 2024 жылы да шетелдік медициналық мекемелерде 46 шымкенттік маман кәсіби біліктілігін жетілдіріп қайтқан болатын. Бұл жұмыстардың барлығы қала медицинасының халықаралық тәжірибеге жақындауына, емдеу стандарттарының сапасын арттыруға және кадрлардың кәсіби өсуіне айтарлықтай әсер етіп отыр.
Шымкент қалалық денсаулық сақтау басқармасы алдағы уақытта да шетелдік жетекші клиникалармен әріптестікті жалғастырып, медицина мамандарының кәсіби дамуын қамтамасыз етуді басты мақсат етіп отыр. Бұл өз кезегінде мегаполис тұрғындарына көрсетілетін медициналық қызмет сапасын арттырып, денсаулық сақтау саласының тұрақты дамуына серпін береді.
