Гонконг қаласында өткен Belt and Road халықаралық саммиті шеңберінде маңызды құжатқа қол қойылды. Саммит аясында Гонконг халықаралық әуежайы мен «Шымкент әуежайы» АҚ арасында өзара тиімді ынтымақтастық туралы меморандумға қол қою рәсімі өтті. Бұл құжат Қазақстан мен Қытай арасындағы көлік-логистикалық байланыстарды жаңа деңгейге шығарып, Шымкенттің аймақтық авиациялық хаб ретіндегі маңызын арттыруға бағытталған стратегиялық қадам болып табылады.
Меморандумға Гонконг әуежайының Басқарма төрайымы Вивиан Чонг пен «Шымкент әуежайы» АҚ Басқарма төрағасы Алик Рашидұлы Ганеев қол қойды. Тараптар ынтымақтастықты бірнеше бағытта дамытуға уағдаласты. Ең алдымен, әуежай инфрақұрылымын басқару және операциялық процестер саласында тәжірибе алмасу көзделіп отыр. Бұл бағыттағы бірлескен жұмыс Шымкент әуежайының халықаралық стандарттарға сай қызмет көрсету сапасын арттырып, тиімді басқару тетіктерін енгізуге жол ашады.
Сонымен қатар тараптар жүк тасымалы мен логистикалық дәліздерді жетілдіру мәселесіне де басымдық бермек. Гонконг – әлемдегі ең ірі транзиттік және сауда орталықтарының бірі, ал Шымкент – Орталық Азиядағы маңызды көліктік торап. Осы екі стратегиялық нүктенің өзара іс-қимылы жаңа транзиттік маршруттар құруға және жүк тасымалының көлемін айтарлықтай арттыруға мүмкіндік береді. Бұл өз кезегінде өңір экономикасына инвестиция тартуға және экспорттық әлеуетті ұлғайтуға сеп болады.
Меморандум шеңберінде мамандардың біліктілігін арттыру мен кадрлар алмасу мәселелері де қарастырылған. Авиация саласындағы заманауи тәжірибелермен бөлісу арқылы екі жақ та кәсіби кадрлар даярлау жүйесін жетілдіріп, қызмет көрсету сапасын жаңа деңгейге көтере алады. Бұған қоса, жолаушылар мен авиакомпанияларға арналған сервистерді жаңғырту бағытында бірлескен жобалар іске асырылмақ. Бұл әуе қатынасының қолайлылығын арттырып, туристер мен бизнес өкілдері үшін сапарларды анағұрлым ыңғайлы етеді.
Аталған меморандум Belt and Road саммитінің маңызды нәтижелерінің бірі болды. Ол Қазақстан мен Қытай арасындағы стратегиялық серіктестікті нығайтып қана қоймай, болашақта жаңа инвестициялық жобаларды жүзеге асыруға арналған сенімді платформа қалыптастырады. Шымкент үшін бұл келісім қаланың халықаралық авиациялық картадағы орнын күшейтіп, логистикалық орталық ретіндегі әлеуетін одан әрі арттыруға зор мүмкіндік бермек.
