Шымкент қалалық әкімдігінде Мемлекет басшысы Қасым-Жомарт Тоқаевтың биылғы Қазақстан халқына Жолдауын іске асыруға арналған кеңейтілген талқылау кеңесі өтті. Маңызды жиынның мақсаты – Жолдауда айқындалған стратегиялық міндеттердің орындалу тетіктерін нақтылап, қаланың әлеуметтік-экономикалық дамуының жаңа бағыттарын айқындау. Кеңеске қала әкімі Ғабит Сыздықбеков, қалалық мәслихат депутаттары, қоғам қайраткерлері, зиялы қауым өкілдері мен сарапшылар қатысты.
Жиынның ашылуында сөз сөйлеген қала әкімі Президенттің әрбір Жолдауы – ел дамуының бағдаршамы екенін атап өтті. Оның айтуынша, Жолдау мемлекет саясатының басым бағыттарын көрсетіп қана қоймай, халықтың болашаққа деген сенімін нығайтып, елдің дамуына серпін береді.
– Мемлекет басшысы өз Жолдауында еліміздің экономикалық өсіміне, әлеуметтік тұрақтылығына, ғылым мен технологияны дамытуға, әділетті қоғам орнатуға бағытталған маңызды бастамаларды ұсынды. Президенттің алға қойған міндеттері – халқымыздың әл-ауқатын арттыруға және жаңа сапалы өмір сүру деңгейіне жетуге бағытталған. Жолдауда экономиканы әртараптандыру, инвестиция тарту, өндіріс секторын күшейту, жаңа жұмыс орындарын құру мәселелері нақты көрсетілді. Бұл стратегиялық міндеттер – еліміздің жаңа дәуірдегі дамуының берік іргетасы. Сол себепті әрқайсымыз ел игілігі жолында аянбай еңбек етуіміз қажет, – деді Ғабит Сыздықбеков.
Кеңес барысында қатысушылар Жолдаудың негізгі басымдықтарына кеңінен тоқталып, олардың жүзеге асу жолдарын талқылады. Шымкент қалалық мәслихатының төрағасы Бахадыр Нарымбетов Жолдаудағы саяси және экономикалық реформалардың маңыздылығын атап өтті. Заң ғылымдарының докторы Бекет Тұрғараев әділетті құқықтық қоғам құру үшін жаңа заңнамалық тетіктердің қажет екенін айтты. Қоғам қайраткері Оңалбай Аяшев пен саясаттанушы Сәуле Рысбаева да өз пікірлерімен бөлісіп, мемлекеттің стратегиялық дамуына қоғамның белсенді қатысуы аса маңызды екенін атап өтті.
Талқылау барысында жасанды интеллект пен цифрлық технологияларды енгізудің маңызына ерекше назар аударылды. Сарапшылардың пікірінше, білім мен ғылым саласын жаңа деңгейге көтеру, жастардың шығармашылық және инновациялық әлеуетін ашу – экономикалық және әлеуметтік дамудың негізгі факторларының бірі.
Сонымен қатар, қатысушылар Жолдауда көтерілген түйінді мәселелерге жан-жақты талдау жасап, оларды іске асыру бойынша нақты ұсыныстарын білдірді. Әсіресе өңірлік экономиканы қолдау, шағын және орта бизнесті дамыту, әлеуметтік инфрақұрылымды жақсарту және кадр даярлау ісін күшейту бағыттары ерекше атап өтілді.
Осылайша, кеңесте айтылған пікірлер мен ұсыныстар Жолдауды тиімді іске асыруға жол ашып, Шымкенттің дамуына жаңа серпін беретіні сөзсіз. Бұл ретте қоғамның әрбір мүшесі ортақ мақсат жолында бірігіп әрекет етуі маңызды екені тағы бір мәрте айтылды.
