Шымкентте AMANAT партиясы қалалық филиалының Партиялық бақылау комиссиясының ұйымдастыруымен Мемлекет басшысы Қасым-Жомарт Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауына арналған кеңейтілген отырыс өтті.
Кеңеске партияның қалалық филиалының төрағасы Мұрат Жолдыхожаев, орынбасары Ербол Байқонысов, Партиялық бақылау комиссиясының төрағасы Ғани Ташқараев, Сыбайлас жемқорлыққа қарсы іс-қимыл жөніндегі кеңес төрағасы Берген Ержаппар, аудандық филиал жетекшілері, мәслихат депутаттары, бастауыш партия ұйымдары мен БАҚ өкілдері қатысты.
Отырыстың басты мақсаты – Президент Жолдауында айқындалған басымдықтарды талқылап, оны қоғам арасында кеңінен насихаттау. Партия төрағасы Мұрат Жолдыхожаев өз сөзінде: «AMANAT – Президент саясатының қоғамдық тірегі. Бұл Жолдау елдің даму бағытын нақты көрсетіп, жүйелі өзгерістердің жалғасы болмақ. Ендігі міндет – осы тапсырмаларды тиімді орындап, нәтижесін халықтың игілігіне айналдыру», – деді.
Ербол Байқонысов жасанды интеллекттің экономикалық болашағына тоқталып: «Жасанды интеллект – болашақ экономикасының іргетасы. Оны тиімді енгізу мемлекеттік басқаруды жетілдіріп, әлеуметтік-экономикалық дамуды жаңа деңгейге көтереді. Партия бұл бастамаларды қолдап, қоғам арасында түсіндіру жұмыстарын күшейтеді», – деді.
Жиында сөз алғандар ел дамуы тек Президент пен партияның емес, бүкіл қоғамның ортақ жауапкершілігі екенін атап өтті. Жасанды интеллект дәуірінде білімді, кәсіби әрі жауапты азаматтардың рөлі арта түспек. Сонымен қатар жұмысшы мамандығының мәртебесін көтеру – ұлттық экономиканың берік негізін қалыптастырудағы маңызды қадам екені де айтылды.
Президенттің стратегиялық бастамалары да кеңінен талқыланды. Жаңа Жасанды интеллект және цифрлық даму министрлігінің құрылуы – елдің толыққанды цифрлық мемлекетке айналуына бағытталған маңызды шешім. Алдағы үш жылда Қазақстан жаңа цифрлық дәуірге аяқ баспақ. Әділетті қоғам орнату жолында отансүйгіштік пен мемлекетшілдікті сөзбен емес, нақты іспен дәлелдеу қажеттігі де ерекше айтылды.
Кеңес соңында Мұрат Жолдыхожаев партияның жаңа кадрларын таныстырды. AMANAT партиясы қалалық филиалы атқарушы хатшысының кеңесшісі болып Бегайдар Тулегенов, ал орынбасары қызметіне Талғат Балтабаев тағайындалды.
