Шымкент қаласында дәстүрлі Бірыңғай есеп беру күні өтіп, мемлекеттік органдар мен кәсіпкерлер қауымдастығының өкілдері бас қосты. Жиынға Шымкент қаласы әкімінің бірінші орынбасары Айдын Кәрімов, қала прокурорының міндетін атқарушы Марлен Сламбеков, «Атамекен» кәсіпкерлер палатасының директоры Сабира Адамбекова, аймақтық департаменттер мен бақылау-қадағалау органдарының басшылары және бизнес өкілдері қатысты.
2021 жылдан бері өткізіліп келе жатқан Бірыңғай есеп беру күнінің басты мақсаты – кәсіпкерлер мен мемлекеттік органдар арасындағы ашық диалог орнату, бақылау-қадағалау қызметін реформалау, заң талаптарын бұзудың алдын алу және қауіпсіз кәсіпкерлікті дамыту болып табылады.
Кәсіпкерлер палатасының директоры Сабира Адамбекова өз сөзінде бұл шараның бизнес үшін маңыздылығын атап өтті. Оның айтуынша, есеп беру күні кәсіпкерлерге бақылау органдарының жұмысы туралы ақпарат алуға, нәтижелерді бірлесе талқылауға және өз ұсыныстарын білдіруге мүмкіндік береді.
Қала әкімінің бірінші орынбасары Айдын Кәрімов өз сөзінде мемлекет басшысының тапсырмасына сәйкес, кәсіпкерлікті қолдау мен қорғау мемлекеттік саясаттың басым бағыты екенін атап өтті. «Әрбір мемлекеттік органның жұмысы кәсіпкерлердің сенімін арттыруға, әкімшілік кедергілерді азайтуға және бақылау-қадағалауды заң аясында жүргізуге бағытталуы тиіс. Біз бұл кездесуде сіздердің ұсыныстарыңызды тыңдап, ортақ мәселелердің шешімін бірге қарастырамыз», – деді ол.
Прокурордың міндетін атқарушы Марлен Сламбеков кәсіпкерлердің құқығын қорғау бағытында атқарылған жұмыстарды баяндады. Биылғы жылы прокуратура органдарына түскен 51 хабарламаның нәтижесінде 16 мыңнан астам кәсіпкердің құқықтары қорғалған. Сонымен қатар, инвестициялық жобаларды жүзеге асыруда прокурорлық сүзгі жалғасып, инвесторлардың заңды құқықтарын қорғау бойынша бірқатар тексерулерге жол берілмеді.
«2025 жылдан бастап кәсіпкерлікке заңсыз араласқан мемлекеттік орган әкімшілік жауапкершілікке тартылатын болады. Бұл бизнеске қолдаудың жаңа деңгейін қалыптастырады», – деді Марлен Сламбеков.
Жиын барысында кәсіпкерлер өзекті мәселелерін көтеріп, мемлекеттік органдар өкілдеріне сұрақтар қойды. Мамандар ұсыныстарды назарға алып, алдағы уақытта оларды шешу жолдарын қарастыруға уәде берді.
Бірыңғай есеп беру күні – тек есеп беру алаңы ғана емес, сонымен бірге мемлекет пен бизнес арасындағы серіктестікті нығайтудың маңызды құралы. Бұл шара бизнес ортасын жақсартуға, кәсіпкерліктің дамуына және әкімшілік қысымды азайтуға нақты серпін беріп отыр.
