Шымкент қаласында Мемлекет басшысы Қасым-Жомарт Тоқаевтың биылғы Қазақстан халқына Жолдауында көтерілген негізгі басымдықтарды түсіндіру және оны жүзеге асыру жолдарын талқылауға арналған кеңейтілген кездесу өтті. Бұл жиын қалалық әкімдіктің тапсырмасына сәйкес ұйымдастырылып, цифрландыру, инновациялық технологиялар және жасанды интеллектіні дамыту мәселелеріне арналды.
Іс-шараға қалалық цифрландыру басқармасының өкілдері, IT-компаниялардың жетекшілері, ЖОО оқытушылары мен студенттер, стартап жобаларының авторлары және саланың басқа да мамандары қатысты. Жиында ең көп назар аударылған тақырыптардың бірі – экономиканы дамытудың жаңа драйвері саналатын жасанды интеллектіні (ЖИ) қолдану болды.
Шымкент HUB аймақтық бөлімінің басшысы Құрманғазы Мұратов сөз сөйлеп, қазіргі таңда жасанды интеллекті шешімдері тек өндірісте ғана емес, сонымен қатар білім беру, денсаулық сақтау, мемлекеттік қызмет көрсету және кәсіпкерлік салаларында да кеңінен енгізіліп жатқанын атап өтті. Оның айтуынша, болашақта бұл технологиялар еңбек нарығын түбегейлі өзгертіп, жаңа мамандықтар мен мүмкіндіктердің пайда болуына жол ашады.
– Біздің негізгі мақсатымыз – Шымкентте IT экожүйесін дамыту, жастардың инновациялық әлеуетін арттыру және олардың стартап жобаларын жүзеге асыруға жағдай жасау. Жыл сайын 170-тен астам түрлі форматтағы іс-шара өткіземіз: стартап академиялары, ноу-код бағдарламалау курстары, хакатондар, тегін семинарлар мен тренингтер. Бұл жастарға заманауи дағдыларды меңгеріп, өз жобаларын нарыққа шығаруға көмектеседі, – деді ол.
Кездесу барысында «Азия Сервис» компаниясы директорының орынбасары Александр Андреевич те сөз алып, жасанды интеллектінің бизнеске әсеріне тоқталды. Оның айтуынша, автоматтандырылған жүйелер мен деректерді талдау құралдарын пайдалану арқылы компаниялар шығындарын қысқартып, қызмет сапасын арттыра алады. Сонымен қатар, ЖИ-ді дұрыс қолдану киберқауіпсіздік деңгейін жоғарылатып, клиенттермен өзара әрекеттесуді жақсартуға мүмкіндік береді.
Соңғы жылдары Шымкент қаласында цифрландыру қарқыны айтарлықтай өскен. «Smart City» жобаларының жүзеге асырылуының арқасында электрондық қызметтерді пайдалану деңгейі 55 пайыздан 76 пайызға дейін артқан. Ал ақпараттық технологияларды енгізу көрсеткіші 44 пайыздан 85 пайызға дейін көтерілген. Бұл деректер қала тұрғындарының цифрлық шешімдерге деген сенімінің артып келе жатқанын және мемлекеттік қызметтердің қолжетімділігі жоғарылағанын көрсетеді.
Кездесуде жастар мен жас мамандарға арналған тегін оқыту бағдарламалары таныстырылды. Атап айтқанда, «Стартап Орда» жобасы аясында қатысушылар екі ай ішінде өз идеяларын толыққанды өнімге айналдырып, оны нарыққа шығару мүмкіндігіне ие бола алады. Бұл бастама кәсіпкерлік дағдыларды дамытуға және инновациялық ойлауды қалыптастыруға бағытталған.
Жиын соңында спикерлер жасанды интеллектінің қоғамдағы рөлі туралы пікір алмасты. Қатысушылардың айтуынша, ЖИ технологияларын меңгеру – қазіргі заман жастары үшін табысты болашақтың кепілі. Ол тек жаңа жұмыс орындарын ашып қана қоймай, ғылыми зерттеулер мен өндірістік процестерді де жаңа деңгейге көтереді.
Осылайша, Мемлекет басшысының Жолдауында айтылған цифрландыру бағыттары Шымкентте нақты іске асып келеді. Қалалық билік, бизнес және білім беру саласының өкілдері күш біріктіре отырып, заманауи технологиялар арқылы экономиканың бәсекеге қабілеттілігін арттыруға және тұрғындардың өмір сапасын жақсартуға бағытталған жұмыстарды жалғастыруда.
