Мемлекет басшысының биылғы Қазақстан халқына Жолдауында көлік және логистика саласын кешенді түрде дамытуға айрықша мән берілді. Президент атап өткендей, қазіргі жаһандық экономика жағдайында еліміздің транзиттік әлеуетін күшейту мен көлік инфрақұрылымын жетілдіру ұлттық экономиканың тұрақты өсуінің негізгі факторларының бірі болып табылады. Бұл тұрғыда мегаполистердің, әсіресе Шымкент қаласының атқаратын рөлі орасан зор.
Жолдауды талқылауға арналған жиында Шымкент қаласының Жолаушылар көлігі және автомобиль жолдары басқармасы Қоғамдық көлік бөлімінің басшысы Бекнұр Әлтеков сөз сөйлеп, мегаполистегі көлік-логистика саласын дамытудың басты бағыттарына тоқталды. Оның айтуынша, қоғамдық көлік қызметінің сапасын арттыру, жаңа бағыттар ашу, экологиялық таза автобустарды кезең-кезеңімен енгізу және тұрғындарға ыңғайлы әрі қауіпсіз тасымалды қамтамасыз ету – басқарманың негізгі міндеттерінің бірі. Сонымен қатар, қаланың стратегиялық маңызын ескеріп, мультимодальды логистикалық орталықтар құру, заманауи аялдамалар мен интеллектуалды көлік жүйелерін орнату жоспарланып отыр.
Шымкент – Қазақстандағы халқы ең тығыз орналасқан әрі ең жылдам дамып келе жатқан мегаполис. Географиялық орналасуы жағынан да қаланың мүмкіндігі зор: ол еліміздің оңтүстігінде, Түркістан облысымен және Өзбекстанмен шекарада орналасқан. Бұл фактор Шымкентті табиғи көлік торабына айналдырады. Бұдан бөлек, «Батыс Еуропа – Батыс Қытай» халықаралық көлік дәлізі дәл осы аймақ арқылы өтеді, бұл қалаға транзиттік және сауда әлеуетін арттыруға қосымша мүмкіндік береді.
Соңғы жылдары еліміздің бірқатар өңірінде жаңа әуежай терминалдары пайдалануға беріліп, халықаралық бағыттар саны көбейіп келеді. Солардың бірі – Шымкент халықаралық әуежайының жаңа терминалы. Оның іске қосылуы тек жолаушылар тасымалын жақсартып қана қоймай, қаланың халықаралық байланысын күшейтіп, Шымкентті аймақтық логистикалық хаб ретінде дамытуға серпін береді. Бұл өз кезегінде жүк тасымалы көлемінің артуына, электронды сауда мен технологиялық өнімдердің жеткізілуін жеделдетуге жол ашады.
Сонымен қатар, қалада теміржол инфрақұрылымын жаңғырту, магистральдық автожолдарды кеңейту және жаңа жүк қоймаларын салу жұмыстары да кезең-кезеңімен жүзеге асырылуда. Бұл шаралардың барлығы Президент Жолдауында көрсетілген стратегиялық міндеттермен үндеседі.
Шымкент – Орталық Азиядағы аса маңызды көлік торабы. Президенттің Жолдауында айтылған тапсырмаларды орындау арқылы қала еліміздің транзиттік әлеуетін арттыруға және Еуразия кеңістігіндегі көлік-логистика картасында жетекші орын алуға зор үлес қосады. Жергілікті атқарушы органдар мен сала мамандарының үйлесімді жұмысы нәтижесінде Шымкент алдағы жылдары өңірлік ғана емес, халықаралық деңгейдегі ірі логистикалық орталықтардың біріне айналмақ.
