Шымкент қаласына жұмыс сапары барысында Премьер-Министрдің орынбасары Ермек Қошербаев қаладағы бірқатар әлеуметтік мекемелердің қызметімен танысты.
Вице-премьер ең алдымен 240 орынға арналған №2 арнайы әлеуметтік қызметтер көрсету орталығына барды. Бұл мекеме 18 жастан асқан психоневрологиялық аурулары бар адамдарға стационарлық қызмет көрсетеді. Қазіргі уақытта ғимаратқа күрделі жөндеу жүргізу және инженерлік желілерді жаңарту қажет. Бұл мәселе тиісті мемлекеттік органдар мен сарапшылардың қатысуымен жұмыс тәртібінде қарастырылатын болады.
Ермек Қошербаев ерекше көңілді қарт адамдар арасында үлкен сұранысқа ие Белсенді ұзақ өмір сүру орталығына бөлді. Мұнда зейнеткерлерге медициналық және психологиялық кеңес беру, спортпен және шығармашылық бағыттармен айналысу, компьютерлік сауаттылық пен шет тілдерін үйрету сияқты қызметтердің кең спектрі ұсынылады. Бүгінгі таңда орталық қызметін 130 адам пайдаланады.
Сапар барысында вице-премьер аға буын өкілдерімен сөйлесіп, олардың ұсыныстары мен пікірлерін тыңдады. Шымкент қаласының тұрғыны Айнагүл Мырзаева өз әсерімен бөлісті:
«Бұрын мен үйде көп уақытты жалғыз өткізетінмін. Мұнда менің жаңа достарым, қызықты іс-әрекеттерім пайда болды. Көңіл күйім жақсарды, өмірге деген қызығушылығым мен қуанышым қайта оралды. Біз би билейміз, әңгімелесеміз, денсаулығымызға мұқият қарайды», – деді ол.
Сол күні орталықта әуен шырқалып, келушілер вальс билеп, жастың қуанышы мен өмірге деген құлшынысы жасқа қарамайтынын көрсетті.
«Қарт адамдардың денсаулығын сақтау ғана емес, олардың қоғамның толыққанды мүшесі екенін сезінуіне, қабілеті мен қызығушылықтарын дамытуына көмектесу аса маңызды. Мұнда, Шымкентте, біз медициналық көмекті мәдени дамумен және жылы қарым-қатынаспен үйлестірудің жарқын үлгісін көріп отырмыз. Мұндай орталықтар – аға буын үшін нағыз тірек орындары. Біз осындай мекемелердің еліміздің барлық өңірінде ашылуы үшін жұмыс істейтін боламыз. Ешбір қарт адам назардан тыс қалып, қамқорлықсыз қалмауы тиіс», – деп атап өтті Ермек Қошербаев.
Шымкентте 99 мыңнан астам зейнеткер тұрады, олардың ішінде 1482 тыл еңбеккері мен 1 Ұлы Отан соғысының ардагері бар. Оларға қамқорлық жасау – қоғамның ғана емес, мемлекеттің де маңызды міндеті. Үкімет осындай мекемелердің дамуын тұрақты түрде қолдап келеді, себебі дәл осындай орталықтар аға буын өкілдеріне құрмет пен қамқорлықты сезінуге, болашаққа сеніммен қарауға мүмкіндік береді.
