Мемлекет басшысы Қасым-Жомарт Тоқаевтың Жолдауында атап көрсетілген басты бағыттардың бірі – адами капиталға инвестиция салу. Бұл мақсатта елімізде білім беру жүйесін жаңғырту, балабақшадан бастап жоғары оқу орындарына дейінгі барлық сатыны жетілдіру бойынша ауқымды жұмыстар атқарылуда. Жаңа бастамалар әрбір жас қазақстандықтың сапалы білім алуына, шығармашылық пен ғылыми әлеуетін дамытуға бағытталған.
Мектепке дейінгі тәрбие мен оқыту саласында қолжетімділікті арттыруға басымдық беріліп отыр. 2025 жылдың басынан бері елімізде 14,8 мың орынға арналған 195 балабақша ашылып, жыл соңына дейін тағы 49 мыңнан астам орын құрылады. Балаларды адал еңбекке баулу, ата-аналарды қолдау, баланың тұлғалық дамуын жетілдіру бағытында жаңа бағдарламалар енгізілуде.
Орта білім беру жүйесінде функционалдық сауаттылық пен XXI ғасыр дағдыларын қалыптастыруға мән берілуде. Қазақстандық оқушылардың халықаралық олимпиадалардағы жетістіктері осы бағыттың тиімділігін дәлелдейді: соңғы оқу жылында 34 халықаралық жарыста 1000-нан астам медаль жеңіп алды, оның ішінде 193-і – алтын. Ауыл оқушыларына қолдау көрсету нәтижесінде олардың республикалық олимпиададағы табыстары бірнеше есе артты.
Білім инфрақұрылымын жаңғырту ісі де жүйелі түрде жалғасуда. 2025 жылы 232 жаңа мектептің құрылысы аяқталмақ, 245 мектепте күрделі жөндеу жүргізіледі. Цифрландыру саласында оқулықтардың 100%-ы электрондық форматқа көшірілді. Инклюзивті білім беру бойынша мектептердің 90%-да жағдай жасалған.
Шымкент қаласы да бұл жұмыстардан шет қалған жоқ. Қалада соңғы үш жылда 25 жаңа мектеп пайдалануға беріліп, 30 мыңнан астам оқушы жаңа орынға жайғасты. 2024 жылы Шымкент оқушылары халықаралық олимпиадаларда 400-ден астам жүлде иеленді. Қала мектептерінің 85%-ы инклюзивті білім берумен қамтылған.
Бұл бастамалардың барлығы Қазақстанның білім саласын жаңа сапалық деңгейге шығарып, жас ұрпақтың болашағына берік негіз қалап отыр.
