2025 жылғы 16 тамызда Шымкент қаласында кезекті жалпықалалық сенбілік ұйымдастырылып, ол «Таза қала» атауымен өтті. Іс-шараның басты мақсаты – мегаполистің санитарлық тазалығын қамтамасыз ету, тұрғындар арасында экологиялық мәдениетті нығайту және қаланы абаттандыру жұмыстарын жүйелі түрде жүргізу.
Бұл жолғы сенбілікке қала әкімдігінің басқармалары мен құрылымдық бөлімшелері, аудан әкімдіктерінің қызметкерлері, коммуналдық мекемелердің жұмысшылары, еріктілер, студенттер және қарапайым қала тұрғындары белсене қатысты. Сенбілік аясында аулалар мен көшелер, саябақтар мен демалыс аймақтары, өзен-көл жағалаулары тұрмыстық қалдықтардан тазартылды. Сонымен қатар қураған ағаш бұтақтары кесіліп, арамшөптер жұлынып, жасыл аймақтарға күтім жасалды.
Әр аудан бойынша сенбілік нәтижелері де айрықша болды:
•Қаратау ауданында 440 қызметкер мен 25 арнайы техника жұмылдырылды. Жұмыс барысында 46,9 тонна қоқыс шығарылып, көшелер мен аулалар айтарлықтай тазарды.
•Еңбекші ауданында 400-ден астам адам мен 33 техника қатысып, кең көлемді санитарлық-тазалық жұмыстары атқарылды. Аудан аумағындағы саябақтар мен қоғамдық орындар тазартылып, жасыл желектерге күтім жасалды.
•Абай ауданында 500-ге жуық тұрғын мен 15 арнайы техника жұмылдырылды. Мұнда қураған бұтақтарды кесу, шөп шабу және көше тазалығы жұмыстары ұйымдастырылды.
Аталған шара елімізде қолға алынған «Таза Қазақстан» жалпыұлттық бағдарламасының бір бөлігі болып табылады. Бұл бастама қоршаған ортаға ұқыпты қарауды қалыптастыруға, тұрғындардың экологиялық мәдениетін арттыруға және жасыл экономика қағидаттарын насихаттауға ықпал етуде.
Сенбілік барысында қала тұрғындары белсенділік танытып, әрбір шағынаудан мен ауланың тазалығы – ортақ жауапкершілік екенін көрсетті. Қаланың ардагерлері мен жастар ұйымдары, еріктілер қозғалысының өкілдері бұл бастаманы әрқашан қолдап, үлгі болып келеді.
Акимат өкілдерінің айтуынша, мұндай жалпықалалық сенбіліктер алдағы уақытта да тұрақты түрде өткізіліп, қала аумағында санитарлық тазалық жұмыстары жүйелі жалғасын табады. Шымкентті көркейтуге бағытталған осындай іс-шаралар мегаполистің тұрғындары үшін қолайлы әрі қауіпсіз орта қалыптастыруға зор үлес қосады.
Қаланың тазалығы – баршаға ортақ жауапкершілік.
