Шымкентте жаңа оқу жылы қарсаңында өткен дәстүрлі Тамыз конференциясы ұстаздарға тың серпін берді. Жиын «Білім келешегі: адал азамат, кәсіби маман» тақырыбында ұйымдастырылып, қала мұғалімдерінің кәсіби дамуы мен оқушылардың болашағына қатысты маңызды міндеттер талқыланды.
Конференцияға ҚР Оқу-ағарту министрі Ғани Бейсембаев, қала әкімі Ғабит Сыздықбеков, зиялы қауым, аудан әкімдері, ардагер ұстаздар мен мектеп басшылары қатысты.
Қалалық Білім басқармасының басшысы Гүлназ Сүлейменова білім сапасын арттыру, мектепке дейінгі тәрбиені кеңейту, балалардың қауіпсіздігін қамтамасыз ету және психологиялық қолдау мәселелеріне тоқталды. Оның айтуынша, балабақшамен қамту деңгейі жыл соңына дейін 96%-ға жетпек. Бұл – ата-аналар үшін үлкен жеңілдік. Сондай-ақ жаңа ваучерлік жүйе енгізіліп, ата-аналардың таңдау еркіндігі кеңеймек.
Жаңа оқу жылында Шымкентте 28 мыңнан астам бүлдіршін алғаш мектепке барады. Бұл көрсеткіш қаланың қарқынды дамып, демографиялық өсімге ие екенін дәлелдейді. Соңғы бес жылда салынған 100-ден астам жаңа мектеп үш ауысымды оқуды азайтып, білім сапасын арттыруға жол ашты.
Министр Ғани Бейсембаев ұстаздарды жаңа оқу жылымен құттықтап, педагог мамандығының қоғамдағы орнына ерекше тоқталды. Ол Ахмет Байтұрсынұлының «Білім беру – ұрпақ алдындағы борыш» деген сөзін еске салып, мұғалім еңбегінің мемлекет үшін стратегиялық маңызын атап өтті. Министрдің айтуынша, соңғы жылдары республика бойынша 1200-ге жуық жаңа білім нысаны салынған, ал Шымкентте инклюзивті білім берудің қамтылуы 95%-ға жеткен.
Жаңа оқу жылында бірнеше тың жобалар іске қосылмақ:
•«Адал азамат» бағдарламасы барлық мектептерде жүзеге асады;
•Жасанды интеллектіні енгізу арқылы «Day of AI» бағдарламасы оқушыларға жаңа білім береді;
•«Келешек мектептері» жобасы арқылы заманауи білім үлгісі жасақталады;
•«ДосболLIKE» бағдарламасы буллингтің алдын алу шараларын күшейтеді.
Қала әкімі Ғабит Сыздықбеков те білім саласына ерекше назар аударылатынын жеткізді. Оның айтуынша, соңғы екі жылда қалада 39 жаңа мектеп пайдалануға берілді, алдағы екі жылда тағы 37 мектептің құрылысы жоспарланған. 3 балабақша мен 2 колледжге күрделі жөндеу жасалды. Балалардың жан-жақты дамуы үшін 500 орындық 2 Оқушылар сарайы ашылды. Сонымен қатар әлеуметтік қолдау шаралары жалғасуда: аз қамтылған отбасылардың балаларына мектеп формасы мен тегін орындар ұсынылуда.
Жиын соңында ұстаздардың еңбегі лайықты бағаланып, үздік педагогтер марапатталды.
