Әлемдегі барша халық пен ұлыс үшін ең үлкен арман – тұрақтылық пен бейбіт өмірге қол жеткізу. Бұл арман Қазақстан үшін өмірлік ұстанымға айналды. Бүгінгі таңда еліміз татулық пен достықты берік қалыптастырып, өзге мемлекеттерге үлгі көрсетіп отыр. Тәуелсіздіктің алғашқы күнінен бастап Қазақстан халқының басты мақсаты – бірлік пен ынтымақты сақтау болды. Осы құндылықтың арқасында еліміз түрлі сынақтардан сүрінбей өтіп, биік жетістіктерге жетіп келеді.
Татулық – кез келген қоғамды біріктіретін ең асыл құндылық. Ол халықтың ынтымағын нығайтып, болашаққа деген сенімін арттырады. Халқымыз «Береке басы – бірлік» деп бекер айтпаған. Шын мәнінде, елдің дамуы мен өркендеуі ауызбіршіліктің арқасында ғана жүзеге асады. Татулығы мықты қоғамда тұрақтылық орнап, әрбір азамат өзін қауіпсіз әрі сенімді сезінеді. Мұндай ортада жас ұрпақ болашаққа зор үмітпен қарайды.
Достық – түрлі этнос өкілдерін, мәдениеттер мен дәстүрлерді біріктіретін ұлы құндылық. Қазақстанда бүгінде 130-дан астам ұлт пен ұлыс өкілдері бір шаңырақ астында тату-тәтті өмір сүріп жатыр. Олардың барлығы ортақ мақсатқа ұмтылып, мемлекетіміздің өркендеуіне үлес қосуда. Бұл – халықтар арасындағы өзара құрмет пен сенімнің, сыйластық пен түсіністіктің айқын жемісі. Достықты бағалай білген ел ешқашан құндылықтарынан айырылмайды, қайта жаңа белестерді бағындырады.
Тәуелсіздік жылдарында Қазақстан әлемге үлгі боларлық ерекше қоғамдық келісім моделін қалыптастырды. Қазақстан халқы Ассамблеясы осы бағыттағы басты институттардың бірі болып саналады. Оның қызметі ұлтаралық татулықты сақтап, халықтар достығын нығайтуға зор үлес қосып келеді. Ассамблея әрбір этностың тілін, мәдениетін, дәстүрін дамытуға жағдай жасап, бейбіт өмірдің іргетасын нығайтты. Бұл – еліміздің тұрақтылығы мен болашағы үшін жасалған маңызды қадам.
Бүгінгі біздің ортақ міндетіміз – бейбіт аспан астында өмір сүріп, бірлікті арттыру, жас ұрпаққа татулық пен достықтың құндылығын дәріптеу. Өйткені даму мен өсіп-өркендеу тек тыныштық пен тұрақтылық орнаған қоғамда ғана мүмкін. Ал даму бар жерде – жарқын болашақ бар. Әрбір қазақстандық өзінің болашағы тек бірліктің арқасында баянды болатынын түсінуі тиіс.
Еліміздің қуаты – бірлікте, күші – татулықта. Егер бірлігіміз бекем, татулығымыз тұрақты болса – елдігіміз де еңселі, болашағымыз да баянды болмақ.
#ТатулықЖәнеДостық #Бірлік #БейбітӨмір #ҚХА30жыл #АНК30лет #PeaceAndHarmony #TogetherForPeace
