Адамзат тарихы бір шындықты дәлелдеді: елдің тұрақтылығы мен дамуы халықтың бірлігіне тікелей байланысты. Ішкі татулық пен өзара түсіністікке көңіл бөлмеген мемлекеттер ұзақ өмір сүре алған жоқ. Ал, керісінше, ортақ мақсат жолында ынтымақпен біріге білген халықтар өркениет көшінде алдыңғы қатардан табылды. Бұл – уақыт сынынан өткен ақиқат.
Қазақстан тәуелсіздігін жариялаған күннен бастап, қоғамдық келісім мен ұлтаралық татулықты ұлттық қауіпсіздіктің басты негізіне айналдырды. Бұл кездейсоқ жасалған таңдау емес, тарихи тәжірибеден алынған сабақ. Қазақ жері әр кезеңде түрлі этностардың ортақ Отаны болды. Ашаршылық жылдарындағы қоныс аударулар, саяси қуғын-сүргін кезеңіндегі жер аударылған халықтар, Ұлы Отан соғысының ауыр сынақтары, тың игеру жылдарындағы жаңа толқындар – осының барлығы елдің этникалық құрамын байытты. Бірақ бұл фактор іріткі емес, қайта мәдениеттердің тоғысуына, өзара құрмет пен түсіністіктің қалыптасуына жол ашты.
«Қазақстан – ортақ үйіміз» қағидасы бүгінде қоғам өміріндегі негізгі құндылықтардың біріне айналды. Түрлі этнос өкілдері білім мен ғылымнан бастап, өнеркәсіп пен мемлекеттік басқаруға дейін барлық салада қатар еңбек етіп жүр. Олар бір-бірінің тілі мен дәстүрін құрметтеп, ортақ жетістіктерге өз үлестерін қосуда. Бұл – бірліктің өмір салтына айналғанының айқын дәлелі.
Бірлік – тек моральдық ұстаным ғана емес. Ол – нақты қоғамдық жүйе. Оның негізінде әлеуметтік келісім, азаматтық теңдік, заңның үстемдігі мен қоғамдық диалог жатыр. Осы бағытта Қазақстан халқы Ассамблеясы 30 жыл бойы бірегей институт ретінде табысты жұмыс істеп келеді. Ассамблея – этностарды жақындастыратын, мәдениеттерді тоғыстыратын әрі елдегі татулықты сақтайтын басты алаң. Оның тәжірибесі бүгінде халықаралық деңгейде мойындалған үлгіге айналды.
Қазіргі жаһандану дәуірінде әлем көптеген сын-қатерлерге тап болуда: геосаяси қақтығыстар, ақпараттық ықпалдар, экономикалық дағдарыстар, климаттық өзгерістер. Осындай жағдайда ең басты қорғанымыз – халықтың ынтымағы мен татулығы. Егер қоғамда сенім, сыйластық пен ортақ мүдде салтанат құрса, сыртқы ықпалдардың ешқайсысы елді шайқалта алмайды.
Қазақстанның ең үлкен жетістігі – азаматтарының бейбіт өмірге, тұрақтылық пен өркендеуге деген ортақ ұмтылысы. Ынтымақ пен келісім бар жерде мемлекет мызғымайды, болашаққа деген сенім де берік болады. Сондықтан бірлікті нығайту – әрбір азаматтың борышы, ал елдің ортақ жетістігі – осы татулықты сақтау.
«Бірлік бар жерде – береке бар» деген қағида халқымыздың болашаққа нық сеніммен қадам басуының кепілі болып қала береді.
#БейбітшілікпенЫнтымақ #БірлікЖәнеКелісім #БізБіргеміз #ҚХА30жыл #АНК30лет #APK30years
