2025 жыл елімізде «Жұмысшылар жылы» деп жарияланғаны белгілі. Бұл бастаманың мақсаты – еңбек адамының қоғамдағы мәртебесін көтеру, олардың әлеуметтік жағдайына, еңбек қауіпсіздігіне және кәсіби дамуына ерекше назар аудару. Осыған орай Шымкент қаласында Қазақстан халқы Ассамблеясы (ҚХА) мүшелері түрлі еңбек ұжымдарымен кездесулер өткізіп келеді. Мұндай игі шаралардың бірі «BIK KANC» жауапкершілігі шектеулі серіктестігінде өтті.
Кездесуге ҚХА мүшелері, кәсіпорын басшылығы, сала мамандары мен жұмысшылар қатысты. Шараның негізгі мақсаты – жұмысшылардың пікірін тыңдау, еңбек ұжымының тыныс-тіршілігімен танысу, сондай-ақ, олардың ұсыныстары мен бастамаларын қолдау болды.
Ассамблея өкілдері алдымен өндіріс орнын аралап, цехтардағы заманауи қондырғылардың жұмысын көрді. «BIK KANC» ЖШС – өңірде кеңсе тауарларын өндіру және тарату саласында өзіндік орны бар кәсіпорындардың бірі. Мұнда еңбек етіп жүрген жүздеген жұмысшы отбасын асырап қана қоймай, жергілікті экономиканың дамуына да үлес қосып келеді. Өндірістік аймақты аралау барысында қонақтар өнімнің сапасына, жұмысшылардың еңбек қауіпсіздігі мен жағдайына ерекше көңіл бөлді.
Кездесу барысында сөз алған Ассамблея мүшелері еңбек адамын қоғамның басты тірегі ретінде атап өтті. Олар жұмысшылардың кәсіби деңгейін арттыру, жастарды еңбекке баулу және әлеуметтік әділеттілікті қамтамасыз ету – бүгінгі күннің маңызды міндеттері екенін жеткізді. Сонымен қатар, «Жұмысшылар жылы» аясында іске асырылып жатқан бірқатар әлеуметтік жобалар туралы ақпарат берілді. Бұл жобалардың ішінде жұмысшыларды қайта даярлау курстарына жіберу, медициналық тексерулерден тегін өткізу, спорттық және мәдени шараларға қатыстыру сияқты бастамалар бар.
Кәсіпорын қызметкерлері де өз ой-пікірлерін ортаға салып, өндірісті жетілдіру және жұмысшылардың жағдайын жақсарту жөнінде ұсыныстар айтты. Әсіресе, жас мамандар кәсіби тәжірибе жинақтау, шетелдік озық технологияларды үйрену және жаңа өнім түрлерін шығару бойынша бастамаларын бөлісті.
Кездесу соңында еңбек озаттары мен үздік қызметкерлерге Шымкент қалалық Қазақстан халқы Ассамблеясының атынан алғыс хаттар табысталды. Бұл марапаттар еңбек адамын ынталандырып қана қоймай, олардың қоғам алдындағы еңбегін мойындаудың айқын дәлелі болды.
«BIK KANC» ұжымымен өткен кездесу еңбек адамына деген құрметтің, олардың еңбегін бағалаудың нақты көрінісіне айналды. Осындай шаралар арқылы жұмысшылардың қоғамдағы мәртебесі артып қана қоймай, ұжымдық бірлік пен өзара сыйластық нығая түсетіні сөзсіз.
Қазақстан халқы Ассамблеясы алдағы уақытта да еңбек ұжымдарымен кездесулерді жалғастырып, олардың пікірін ескеріп, ұсыныстарын мемлекеттік органдарға жеткізуді мақсат етіп отыр. Бұл өз кезегінде еңбек адамына деген қолдауды күшейтіп, еліміздегі әлеуметтік тұрақтылық пен бірлікті нығайта түспек.
\#ҚХА30жыл #30летАНК #Шымкент #Shymkent #АНК #ANK #APK30years
