Шымкент қаласында еңбек нарығын дамыту және тұрғындарды жұмыспен қамту мүмкіндіктерімен таныстыру мақсатында ақпараттық іс-шара өтті. Еңбек мобильділігі орталығы мен Еңбекші ауданы бойынша Мансап орталығының ұйымдастыруымен Қазақстан–Түркия саябағында шағын жәрмеңке ұйымдастырылып, тұрғындарға Enbek.kz порталындағы бос жұмыс орындары мен еңбек нарығындағы өзекті бағдарламалар түсіндірілді.
Іс-шара барысында Мансап орталығының мамандары саябаққа келген әрбір азаматқа еңбекпен қамтудың түрлі жолдарын түсіндіріп, кеңес берді. Атап айтқанда, қатысушыларға **қысқа мерзімді кәсіптік оқуларға қатысу тәртібі**, **кәсіпкерлік негіздері бойынша білім алу мүмкіндіктері**, **өңіраралық жұмыспен қамту бағдарламалары** және **Enbek.kz қосымшасы арқылы жұмыс іздеу жолдары** жан-жақты түсіндірілді.
Enbek.kz – Қазақстан Республикасы Еңбек және халықты әлеуметтік қорғау министрлігінің қолдауымен жұмыс істейтін бірыңғай электронды еңбек биржасы. Портал арқылы кез келген азамат өзіне қажетті бос жұмыс орындарын қарап қана қоймай, жұмыс берушімен онлайн байланыс орнатып, бейнеәңгімелесу арқылы сұхбаттасу мүмкіндігіне ие. Бұл тұрғындардың уақытын үнемдеп, жұмысқа орналасу процесін жеңілдетеді.
Жәрмеңкеде арнайы ақпараттық бұрыш ұйымдастырылып, тұрғындарға **Enbek.kz және migration.kz порталдарының QR-коды бар парақшалар** таратылды. QR кодты сканерлеу арқылы азаматтар бірден порталға кіріп, қолжетімді бос жұмыс орындары туралы толық ақпарат ала алады. Мәселен, Enbek.kz қосымшасы арқылы Шымкент қаласындағы мемлекеттік мекемелер мен жекеменшік кәсіпорындардағы бос орындармен танысуға болса, migration.kz белгісі бар QR кодты сканерлеу арқылы еңбек күші жетіспейтін солтүстік өңірлердегі бос жұмыс орындарын көруге мүмкіндік беріледі.
Бұл шара – жұмыспен қамту саласындағы мемлекеттік бағдарламаларды халыққа жақындатудың тиімді жолдарының бірі. Мамандардың айтуынша, қазіргі таңда Enbek.kz қосымшасында мыңдаған бос жұмыс орны бар. Оның ішінде денсаулық сақтау, білім беру, құрылыс, қызмет көрсету және өндіріс салаларындағы түрлі деңгейдегі мамандарға сұраныс жоғары. Сонымен қатар, портал арқылы жастар тәжірибесі, әлеуметтік жұмыс орындары және алғашқы жұмыс орны сияқты бағдарламаларға қатысуға болады.
Жәрмеңкеге қатысқан тұрғындар іс-шараның пайдалы болғанын атап өтіп, мамандардан өздеріне қажетті бағыттар бойынша нақты кеңес алды. Көпшілігі мобильді қосымшаны сол жерде жүктеп алып, қызметін тексеріп көрді.
Осылайша, Шымкент қаласының Еңбек мобильділігі орталығы мен Мансап орталығы еңбек нарығында қолжетімді мүмкіндіктерді тұрғындарға түсіндіруді жалғастыра бермек. Мұндай шаралар алдағы уақытта да қала аудандарында тұрақты түрде өткізіліп, азаматтардың жұмысқа орналасу деңгейін арттыруға үлес қоспақ.
