Шымкент қаласында 2025 жылғы Мемлекет басшысының Жолдауында белгіленген тапсырмаларды жүзеге асыру бағытында нақты жұмыстар атқарылуда. Әсіресе өнеркәсіп саласындағы көрсеткіштер мен жоспарлар қала экономикасының дамуына серпін беруде. Президент Қасым-Жомарт Тоқаев өз Жолдауында өңдеу өнеркәсібін дамытуға ерекше көңіл бөліп, отандық өндірісті әртараптандыру мен бәсекеге қабілеттілігін арттыруды міндеттеген болатын. Осы мақсатта Шымкентте индустриялық-инновациялық даму бағдарламасы аясында бірқатар жобалар қолға алынды.
2025 жылдың алғашқы жартыжылдығында қалада жалпы сомасы 22,5 миллиард теңгені құрайтын 8 өндірістік жоба іске қосылды. Бұл жобалар тағам өндірісі, құрылыс материалдары, жеңіл және химия өнеркәсібі бағыттарын қамтиды. Аталған жобалар арқылы 500-ден астам жаңа жұмыс орны ашылып, халықты жұмыспен қамтуға зор үлес қосылды. Сонымен қатар, іске қосылған кәсіпорындардың көбі заманауи технологиялар мен автоматтандырылған жүйелерді пайдалана отырып, еңбек өнімділігін арттыруда.
Шымкенттегі индустриялық аймақтардың инфрақұрылымын дамыту да басты назарда. Қазіргі таңда үш ірі индустриялық аймақта 130-дан астам жоба жүзеге асырылып жатыр. Олардың қатарында экспортқа бағытталған өндіріс ошақтары да бар. Бұл өз кезегінде қала экономикасының ашықтығын және жаһандық нарыққа шығу мүмкіндіктерін көрсетеді. Мысалы, 2025 жылы іске қосылатын жобалардың қатарында заманауи құрылыс материалдарын шығаратын зауыттар мен фармацевтикалық кәсіпорындар бар.
Мемлекеттік қолдау шараларының арқасында кәсіпкерлерге қаржылай және әкімшілік тұрғыда қолайлы жағдайлар жасалуда. Жеңілдетілген несиелер, салықтық жеңілдіктер және инфрақұрылыммен қамтамасыз ету – жаңа өндіріс орындарын ашуға ынталандыратын негізгі факторлардың бірі. Бұл саясат Шымкент қаласын еліміздегі ірі өндірістік хабтардың біріне айналдыруға ықпал етуде.
Өңірлік өнеркәсіптік саясаттың тағы бір бағыты – жасыл технологияларды енгізу. Шымкенттегі жаңа зауыттардың бірқатары экологиялық таза өндіріс стандарттарына сай салынуда. Бұл халық денсаулығын қорғау және қоршаған ортаны сақтау мақсатындағы маңызды қадам саналады.
Президент Жолдауындағы тапсырмаларды іске асыру шеңберінде Шымкент қаласының әкімдігі мен кәсіпкерлер арасында тығыз байланыс орнаған. Жергілікті билік бизнес-ортаны жақсартуға, шетелдік және отандық инвесторлармен серіктестік орнатуға басымдық беруде. Осылайша, өнеркәсіптік сектордағы жүйелі жұмыстар қаланың жалпы экономикалық әлеуетін арттырып, тұрақты даму негізін қалыптастырып келеді.
