Мемлекет мүмкіндігі шектеулі азаматтардың құқықтарын қорғау және қоғам өміріне толыққанды араласуын қамтамасыз ету мақсатында бірқатар жүйелі жұмыстар жүргізуде. Осы бағытта Шымкент қаласында әлеуметтік қолдау тетіктері жылдан жылға жетілдіріліп, нақты нәтижелерге қол жеткізілуде.
Бүгінгі таңда қалада 42 479 мүмкіндігі шектеулі азамат тіркелген. Оның ішінде 8 275-і – 18 жасқа дейінгі ерекше қажеттілігі бар балалар. Бұл азаматтардың барлығы әлеуметтік қызметтермен қамтылып, әрқайсысының жағдайына жеке көзқарас пен қолдау қарастырылуда.
Мүгедектігі бар азаматтарға мемлекеттік қолдаудың заманауи және тиімді формасы – Әлеуметтік қызметтер порталы. Бұл цифрлық жүйе арқылы пайдаланушылар техникалық оңалту құралдары мен қажетті әлеуметтік қызметтерге үйден шықпай-ақ өз бетінше тапсырыс бере алады. Электрондық цифрлық қолтаңба (ЭЦҚ) арқылы тіркелу қарастырылған. Жүйенің қолжетімді болуын қамтамасыз ету мақсатында қалалық жұмыспен қамту және әлеуметтік қорғау басқармасының ғимаратында өз-өзіне қызмет көрсету бұрышы ашылды. Бұл жерде кәсіби мамандар азаматтарға порталды пайдалану бойынша кеңес беріп, нақты көмек көрсетеді.
2025 жылдың басынан бері мүмкіндігі шектеулі жандарға арналған оңалтудың жеке бағдарламалары бойынша 41 788 өтініш қабылданған. Оның 72,2 пайызы – яғни 30 167 өтініш нақты қанағаттандырылып, тиісті қызметтер көрсетілді. Бұл көрсеткіш әлеуметтік қызметтердің уақтылы әрі сапалы жеткізіліп отырғанын дәлелдейді.
Цифрлық қызметтерді енгізу – мемлекеттің ашықтығын, қолжетімділігін және жедел әрекет ету қабілетін арттырудағы маңызды тетік. Мұндай тәсіл әсіресе мүмкіндігі шектеулі азаматтар үшін күнделікті өмірде үлкен жеңілдік пен қолдау тудырады. Әлеуметтік қамсыздандырудың жаңарған бұл форматы инклюзивті қоғам құруға бағытталған мемлекеттік саясаттың табысты жүзеге асып жатқанын көрсетеді.
Шымкент қаласында алдағы уақытта да бұл бағыттағы жұмыстар жалғасып, әлеуметтік қолдаудың жаңа форматтары енгізіледі. Ең басты мақсат – әрбір азаматтың өмір сүру сапасын арттырып, қоғамдағы тең мүмкіндіктерге жол ашу.
