Шымкент қаласында жайлы әрі қауіпсіз қалалық ортаны қалыптастыру бағытында жүйелі жұмыстар жалғасуда. Әлеуметтік инфрақұрылымды дамыту – бұл үдерістің негізгі бөлігі болып табылады. Соңғы жылдары белсенді дамып келе жатқан Тұран ауданында жаңа спорттық және ойын алаңшаларының ашылуы – осының айқын көрінісі. Бұл нысандар «Халық қатысатын бюджет» бағдарламасы аясында және тұрғындардың тікелей ұсыныстары негізінде жүзеге асырылды.
Аталған жобаның басты ерекшелігі – халықтың белсенді қатысуы. Алаңшалар орнатылатын орындар мен олардың техникалық ерекшеліктері жергілікті тұрғындардың пікірлері негізінде анықталды. Осылайша, ашылған нысандар тек ойын-сауық пен спортқа арналған орындар ғана емес, сонымен бірге тұрғындардың нақты қажеттілігіне жауап беретін қоғамдық кеңістіктерге айналды.
Жаңа алаңшалар заманауи стандарттарға сай жабдықталған. Травматизмнің алдын алуға арналған жұмсақ резеңке жабынды қолданылды, ал ойын және спорт құралдары балалардың жас ерекшеліктеріне қарай таңдалды. Мысалы, кіші жастағы балалар үшін әткеншек, сырғанақ, құмсалғыш орнатылса, жасөспірімдерге арналған спорттық аймақтарда турник, уличный тренажер, баскетбол сақинасы, мини-футбол алаңы қарастырылған. Бұл – көпқабатты тұрғын үйлер тығыз орналасқан аймақта әртүрлі жастағы балалардың белсенді уақыт өткізуіне қолайлы жағдай жасайтын орта қалыптастырды.
Алаңшалар тек ойын алаңы ғана емес, сонымен қатар аулаларды абаттандыру бағдарламасының бір бөлігіне айналды. Нысандар айналасы көгалдандырылып, орындықтар, қоқыс жәшіктері, жарық шамдары орнатылды. Бұл өз кезегінде қауіпсіз, таза әрі отбасылық демалысқа лайықты қоғамдық кеңістік құруға мүмкіндік берді. Мұндай алаңдар – көршілермен байланыс орнатуға, ортақ жауапкершілік пен аула мәдениетін дамытуға септігін тигізетін маңызды әлеуметтік орта.
Спорттық және ойын алаңшалары балалар мен жасөспірімдердің денсаулығын нығайтуға, салауатты өмір салтын қалыптастыруға үлкен ықпал етеді. Ашық аспан астында жүйелі түрде дене белсенділігімен айналысу балалардың физикалық дамуына, иммунитетінің артуына және әлеуметтік қарым-қатынас дағдыларының қалыптасуына әсер етеді. Бұл — ұзақмерзімді денсаулық кепілі болып табылады.
Соңғы жылдары Тұран ауданы қаланың қарқынды дамып келе жатқан аудандарының бірі ретінде ерекшеленіп келеді. «Халық қатысатын бюджет» бағдарламасы аясында мұнда 38 балалар ойын алаңшасы, 12 спорт алаңы және 8 көпфункционалды кешен салынды. Бұл — халықтың өмір сапасын жақсартуға бағытталған нақты шаралардың жемісі. Қулагер шағынауданындағы жаңа алаңшалар – осы жүйелі жұмыстың жалғасы.
