Қазақстан Республикасының Президенті Қасым-Жомарт Тоқаев Халықаралық азаматтық авиация ұйымы (ICAO) кеңесінің президенті Сальваторе Шаккитаноны қабылдады. Кездесу барысында Қазақстан мен ICAO арасындағы серіктестіктің қазіргі деңгейі мен алдағы даму перспективалары талқыланды.
Кездесу барысында Мемлекет басшысы еліміздің азаматтық авиация саласындағы жетістіктеріне тоқталды. Атап айтқанда, Қазақстан — өңірде тәуелсіз Авиация әкімшілігін құрған алғашқы мемлекет. Бұл құрылымның енгізілуі ұшу қауіпсіздігіне деген бақылауды едәуір күшейтті. Сонымен қатар, авиациялық қызмет сапасын халықаралық стандарттарға сай дамытуға жол ашты.
Президент атап өткендей, өткен жылдан бері Монреаль қаласында ICAO жанындағы Қазақстан Республикасының Тұрақты өкілдігінің кеңсесі жұмыс істей бастады. Бұл — еліміздің авиация саласында халықаралық ұйымдармен жүйелі әрі тұрақты диалог жүргізуіне мүмкіндік беретін маңызды қадам.
Қазақстанда халықаралық әуе бағыттарының географиясы жыл санап кеңейіп келеді. Қазіргі таңда еліміз әлемнің 30-дан астам елімен тікелей әуе қатынасын орнатты. Жақын болашақта Нью-Йорк, Токио және Сингапур қалаларына тұрақты рейстер ашу жоспарлануда. Бұл Қазақстанның транзиттік әлеуетін одан әрі арттыра түспек.
Мемлекет басшысы сондай-ақ елдегі әуежай инфрақұрылымын жаңғырту бағытындағы жұмыстар туралы айтты. 2023 жылы Алматы, Шымкент және Қызылорда қалаларында жаңа терминалдар іске қосылды. Әсіресе Алматы халықаралық әуежайының өткізу қабілеті айтарлықтай – жылына 2,5 миллионнан 14 миллион жолаушыға дейін ұлғайған. Бұл – аймақтағы ең ірі авиациялық инфрақұрылым жобаларының бірі.
Кездесу аясында Қазақстан мен ICAO арасында азаматтық авиацияны дамытуға арналған бас жоспар жобасына қол қою мәселесі де сөз болды. Бұл құжат саладағы ұзақмерзімді стратегияны айқындап, заманауи стандарттарға негізделген реформаларды жүйелі жүзеге асыруға негіз болады.
Өз кезегінде ICAO кеңесінің президенті Сальваторе Шаккитано Қазақстанның азаматтық авиация саласындағы жетістіктеріне жоғары баға беріп, еліміздің авиациялық инфрақұрылымын дамытудағы жүйелі жұмысты атап өтті. Ол Қазақстанда бұл салада тұрақты өсім байқалып отырғанын және халықаралық нормаларға сай құрылым қалыптасқанын ерекше атап өтті.
