Шымкент қаласында ҚР Парламенті Сенатының депутаты, Әлеуметтік-мәдени даму және ғылым комитетінің мүшесі Айгүл Қапбарова мәдениет және өнер саласының өкілдерімен кездесу өткізді. Бұл басқосу сала мамандарының өзекті мәселелерін ортаға салып, ұсыныс-пікірлерін ашық айтуына мүмкіндік берді.
Кездесу барысында сенатор Мәдениет туралы заңға енгізілген жаңашылдықтармен таныстырды. Атап айтқанда, заңнамаға алғаш рет «мәдениет ұйымы» және «мәдениет қызметкері» ұғымдары енгізілді. Бұрын тек ауызекі қолданылып келген бұл атаулар енді нақты заңдық негізге ие болды. Бұл түзетулер мәдениет қызметкерлерінің кәсіби мәртебесін арттырып, олардың біліктілігін жүйелі түрде жетілдіруге жол ашады.
Айгүл Жарылқасынқызы Мемлекет басшысының тапсырмасымен мәдениет саласын жаңғырту мен креативті индустрияны дамыту бағытында бірқатар жаңа нормалар қабылданғанын атап өтті. Бұдан былай театрлар, музейлер, мәдениет үйлері ішкі ұйымдастыру тәртібі, көркемдік кеңестер мен басқару құрылымына қатысты нақты ережелермен жұмыс істейді. Мәдени ескерткіштерді орнату мен сақтау тәртібі жергілікті мәслихаттардың құзыретіне беріліп отыр.
Сенатор сала қызметкерлерін толғандырып отырған шешілмеген түйткілдерге де тоқталды. Театр және БҒМ-ге қарасты кітапхана қызметкерлерінің төмен жалақысы аттестациядан өтуге кедергі келтіріп, олардың кәсіби өсуіне тосқауыл болып отыр. Бұл мәселе де Сенат деңгейінде қарастырылып, бақылауда ұсталатыны айтылды.
Ашық форматта өткен кездесуде мәдениет қызметкерлері депутатпен еркін пікір алмасып, өз ұсыныстарын жеткізді. Қазіргі таңда Сенат қабырғасында мәдениет нысандарының материалдық-техникалық базасын жаңғырту, шығармашыл жастарды қолдау және сала мамандарының әлеуметтік мәртебесін көтеру бойынша ауқымды жұмыстар жүргізілуде.
