Қазақстанда медициналық көмекті қаржыландыруда жаңа модельге көшу басталды. Денсаулық сақтау министрлігі халықаралық тәжірибеге сүйене отырып, халықтың қажеттілігі мен бюджеттік мүмкіндіктерді ескерген,нақты өзгерістерді ұсынып отыр. Жаңа жүйе 2026 жылдан бастап толық енгізіледі.
Енді тегін медициналық көмектің кепілдік берілген көлемі (ТМККК) мен міндетті әлеуметтік медициналық сақтандыру (МӘМС) арасындағы шекара нақты ажыратылатын болады. Бұл өзгеріс қызметтердің тиімділігін арттыруға, қайталанатын рәсімдер мен шығындарды қысқартуға мүмкіндік береді.
Мемлекет басшысының 2024 жылғы 2 қыркүйектегі Жолдауында айтылған тапсырмасына сәйкес, бірыңғай мемлекеттік медициналық көмектің жаңа пакеті қалыптасып жатыр. Оның басты мақсаты – медициналық қызметтердің ашықтығы мен қолжетімділігін қамтамасыз ету, әлеуметтік маңызы бар ауруларды ерте кезеңде анықтау, онкологиялық дерттерді скрининг арқылы тез қамту және науқастарға уақтылы көмек көрсету.
Маңыздысы – енді онкоскринингтер барлық азаматтарға, сақтандыру мәртебесіне қарамастан, тегін әрі қолжетімді болады. Сонымен қатар, туберкулез, АИТВ секілді ауруларға диагностика да ақысыз жүргізіледі. Жаңа үлгі бойынша жедел жәрдем, алғашқы тексеру, вакцинация, паллиативтік көмек пен шұғыл жағдайлар базалық пакетке кіреді.
Жүйе медициналық ресурстарды оңтайлы қайта бөлуге және қаржылық тұрақтылықты қамтамасыз етуге бағытталған. Бұл тәсіл шетелде де бар: мысалы, Ресей мен Эстонияда тек шектеулі қызметтер тегін, ал Германия мен Нидерландыда мейіргерлік күтімге басымдық берілген еді. Қазақстандағы реформа – халықтың денсаулығына кепілді әрі әділ қолжетімділік беретін маңызды қадам.
