Жаңа 2024–2025 оқу жылынан бастап еліміздегі барлық білім беру ұйымдарында, соның ішінде жекеменшік мектептерде де тәрбие жұмысы «Адал азамат» атты бірыңғай бағдарлама негізінде жүргізіледі. Бұл – бұған дейін жүзеге асырылған «Біртұтас тәрбие» тұжырымдамасының жаңа мазмұндағы жалғасы. Бағдарлама Мемлекет басшысы ұсынған «Адал азамат – адал еңбек – адал табыс» қағидасымен өзара үйлестірілген.
ҚР Оқу-ағарту министрлігінің 2025 жылғы 26 мамырдағы №123 бұйрығымен бекітілген бұл бағдарлама арқылы оқушыларды адалдыққа, еңбекқорлыққа, елжандылыққа баулу көзделіп отыр. Бағдарламаның үйлестірушісі – Ы. Алтынсарин атындағы Ұлттық білім академиясы.
Бағдарлама алғаш рет жекеменшік мектептерге де міндеттеліп отыр. Бұл бастама тәрбие жұмысын ел бойынша бірізді жүйеге түсіреді. Сонымен қатар, мектеп пен ата-ана, қоғам арасындағы байланысты нығайту, жас ұрпаққа ұлттық құндылықтарды бойына сіңіру – негізгі мақсаттардың бірі.
Барлық мектептер үшін ортақ визуалды стандарт – брендбук енгізіледі. Мектептің ішкі-сыртқы келбеті, сабақ кестесі, тәрбие форматы ұлттық тәрбиелік мазмұнға сәйкестендіріледі. Ай сайынғы тақырыптар – әділдік, патриотизм, еңбекқорлық сынды құндылықтар сынып сағаттарынан бастап, қосымша іс-шараларға дейін тұтастықта жоспарланады.
Осы бағдарлама аясында Шымкент қаласында да дайындық жұмыстары басталып кетті. Қалалық білім басқармасының мәліметінше, мегаполистегі 150-ден астам жалпы білім беру ұйымы жаңа форматқа көшуге дайын. Мұғалімдер мен сынып жетекшілерге арнайы оқыту курстары ұйымдастырылуда. Сонымен қатар, қала мектептерінде «Өнегелі 15 минут», күй әуенімен қоңырау соғу, ұлттық ойындарды енгізу жұмыстары пысықталуда. Бұл жаңашылдықтар оқушының ұлттық сана-сезімін қалыптастырып қана қоймай, мектеп өмірін мазмұнды етуге бағытталған.
Бағдарлама аясында құқық қорғау, ішкі саясат, денсаулық сақтау мекемелерімен байланыс артып, тәрбие жүйесі кешенді сипат алады. Шымкент қаласында да бұл бағытта бірлескен жоспар бекітіліп, әр білім беру ұйымында тәрбие жөніндегі арнайы үйлестірушілер белгіленді.
