Шымкент қаласында «Қазақстан халқына» қоғамдық қорының алғашқы өңірлік баспасөз туры өтті. Шара қордың үш жылдық жұмысын қорытындылау және жүйелі қайырымдылық бастамаларын насихаттау мақсатында ұйымдастырылды.
Баспасөз туры барысында жергілікті және республикалық БАҚ өкілдері, блогерлер мен қоғам белсенділері қордың қолдауымен ашылған және жүзеге асырылып жатқан бірқатар әлеуметтік нысандарды аралады. Қатысушылар алдымен Ерте араласу орталығының жұмысымен танысты. Бұл орталық дамуында кідірісі бар балаларды ерте кезеңнен қолдауға бағытталған.
Мұнан соң делегация “QH Оңалту орталықтары” қайырымдылық бағдарламасы аясында ашылған оңалту орталығына барды. Бұл мекеме ерекше қажеттілігі бар балаларға кешенді оңалту қызметтерін ұсынады. Сонымен қатар, «Қамқорлық» №8 балаларға арнаулы әлеуметтік қызметтер көрсету орталығының базасында жұмыс істеп тұрған Аутизм орталығының қызметімен танысуға мүмкіндік болды. Орталық аутизм спектрі бұзылған балаларға арналған қолжетімді әрі сапалы қызмет көрсетеді.
Баспасөз турының келесі нүктесі — TEN QOGAM әлеуметтік қолдау орталығы. Мұнда қордың «QH үй жағдайында мүгедектігі бар балаларды оңалту» жобасы іске асырылып жатыр. Жоба аясында мамандар балалардың үйіне барып, арнайы оңалту бағдарламаларын ұсынады.
Сапар барысында «Көмекші мектеп-интернат» КММ мен «Тұсау кесер» жобасы аясында ашылған спорт залы да көрсетілді. Бұл жобалар инклюзивті білім беру мен ерекше балалардың дене дамуына жағдай жасауға бағытталған.
2022 жылдан бері «Қазақстан халқына» қоры Шымкент қаласында жалпы сомасы 12,1 млрд теңгеге қайырымдылық көмек көрсеткен. Пресс-тур барысында осы қаржы аясында жүзеге асқан жобалардың нақты нәтижесі жұртшылық назарына ұсынылды.
Аталған әлеуметтік нысандар мен жобалар туралы толығырақ газетіміздің алдағы санынан оқи аласыздар.
