Шымкенттегі Qyzgaldaq сарайында «Шымкент қаласының тұрақты дамуы: азаматтық қоғам институттарының рөлі» тақырыбында өңірлік деңгейдегі форум өтті. Іс-шара Қазақстанның XII Азаматтық форумына дайындық аясында ұйымдастырылды.
Жиынның негізгі мақсаты — азаматтық қоғам мен мемлекеттік сектор арасындағы серіктестікті дамыту, өзара байланысты нығайту және қоғамдық бастамаларды қолдау. Шараны Шымкент қаласының Ішкі саясат және жастар істері басқармасы мемлекеттік әлеуметтік тапсырыс аясында жүзеге асырды.
Форумға үкіметтік емес ұйымдардың белсенді мүшелерімен қатар, мемлекеттік органдардың өкілдері, халықаралық ұйымдар, кәсіпкерлік құрылымдар мен бұқаралық ақпарат құралдарының қызметкерлері қатысты. Олар қаланың тұрақты дамуына азаматтық сектордың ықпалын, ҮЕҰ қызметінің тиімділігін және азаматтардың қоғамдық өмірге белсене араласу жолдарын ортаға салды.
Биылғы бағдарлама мазмұн мен ұйымдастыру тұрғысынан кеңейіп, бірнеше панельдік отырысты қамтыды. Форумның пленарлық отырысында әлеуметтік әріптестік, мемлекеттік әлеуметтік тапсырыстың ашықтығы, жастар ресурстық орталықтарының әлеуеті, цифрландыру үдерісі мен қоғамдық бақылау механизмдері талқыланды. Сонымен қатар, ашық пікірталастар, табысты жобалар таныстырылымы және «ҮЕҰ өмірі — бір сәт бейнеде» атты фотокөрме көпшіліктің назарына ұсынылды.
Екі жылда бір өтетін өңірлік форум азаматтық сектордың бүгінгі ахуалын ғана емес, болашақтағы даму бағдарын айқындауға негіз болды. Әсіресе, азаматтық қоғамды дамыту тұжырымдамасының өңірлік деңгейде қалай жүзеге асып жатқанына баса назар аударылды.
Ұйымдастырушылар қатысушы тараптарға алғыс айтып, азаматтық белсенділік пен қоғамға қызмет етудің ортақ мүдде жолындағы маңызын атап өтті. Шара қорытындысы Шымкенттің инклюзивті әрі тұрақты дамуына серпін береді деп күтілуде.
