Цифрлық даму – қазіргі заманның негізгі бағыты. Әлем елдері интернетті тек байланыс құралы емес, экономикалық, әлеуметтік, білім беру және мемлекеттік қызметтерді цифрландырудың іргетасы ретінде қарастырады. Осы орайда, Қазақстанда қолға алынған «Қолжетімді интернет» ұлттық жобасы – елдегі интернет инфрақұрылымын жетілдіріп, әрбір азамат үшін цифрлық қызметтерге тең қолжетімділікті қамтамасыз етуге бағытталған кешенді бастама.
Шымкент – халық саны миллионнан асқан мегаполис, әрі демографиялық өсімі ең жоғары қалалардың бірі. Қаланың шет аймақтарында жаңа шағынаудандар қарқынды дамып, инфрақұрылымға сұраныс артуда. Осы ретте интернет желісінің қолжетімділігі қала тұрғындарының өмір сүру сапасына тікелей әсер етеді. «Қолжетімді интернет» жобасы аясында бұл мәселені шешуге нақты қадамдар жасалуда.
2023 жылдан бастап қалада оптикалық-талшықты байланыс желілерін тарту жұмыстары жүргізілуде. Қазірдің өзінде 200-ге жуық әлеуметтік маңызды нысан – мектептер, балабақшалар, ауруханалар мен әкімшілік ғимараттар кеңжолақты интернетпен жабдықталды. Бұл білім беру мен денсаулық сақтау салаларында цифрлық сервистерді тиімді пайдалануға мүмкіндік беріп отыр.
Сонымен қатар, интернет сапасын арттыру мақсатында қалада 4G және 5G мобильді желілерін енгізу үдерісі басталды. Қаланың орталық бөлігінде 5G сынақ режимінде іске қосылып, интернет жылдамдығы бірнеше есеге ұлғайды. Бұл, әсіресе, стартап жобалар, онлайн-білім, электронды коммерция салалары үшін жаңа мүмкіндіктер ашуда. Ал 2025 жылға дейін қала шетіне дейін толықтай қамту жоспарланған.
Жоба аясында тұрғын үй массивтерімен қатар, өндірістік аймақтарға да интернет желілері тартылып жатыр. Бұл – цифрлық экономиканың дамуына, кәсіпкерліктің жаңа технологияларды пайдалануы мен электрондық саудаға белсенді араласуына жағдай жасауда. Интернеттің қолжетімділігі – тұрғындардың онлайн мемлекеттік қызметтерді алу мүмкіндігін кеңейтуде маңызды рөл атқарып отыр.
Шымкент қаласында жүзеге асып жатқан «Қолжетімді интернет» жобасы – бұл тек байланыс сапасын жақсарту ғана емес, әлеуметтік теңдікті орнату, цифрлық сауаттылықты арттыру және жаңа инновациялық экожүйе қалыптастыру жолындағы нақты әрі жүйелі жұмыс. Жоба толық жүзеге асқанда, Шымкент тек өңірлік емес, республикалық цифрлық даму орталығына айналуы әбден мүмкін.
