ТӘЖІРИБЕЛІ МАМАН, СЕНІМДІ ТӘЛІМГЕР

Бердыбаев Мұрат Егізбайұлы 1967 жылы Шымкент қаласында дүниеге келген. 2006 жылдың 20 шілдесінен бері Шымкент қалалық жедел жәрдем көрсету станциясының №2 бекетінде жүргізуші ретінде абыройлы қызмет атқарып келеді.
Ол жедел жәрдем қызметінде 19 жылдан астам уақыт еңбек етіп, қиын сәттерде бригада құрамын науқастарға барынша жылдам әрі қауіпсіз жеткізу арқылы тұрғындарға сапалы медициналық қызмет көрсетуге зор үлес қосып келеді. Шақырту түскен бойда жедел жәрдем бригадасының уақтылы жолға шығуын қамтамасыз етіп, ең қысқа және қауіпсіз маршруттарды таңдайды.
Кәсібилік пен жауапкершілік
Мұрат Егізбайұлы жүргізуші ретінде тек көлікті басқарумен шектелмей, дәрігерлер мен фельдшерлерге науқастарды тиеуге, түсіруге, тасымалдауға, қажет болған жағдайда иммобилизация жасауға көмектеседі. Медициналық аппаратураларды тасымалдап, қосу жұмыстарын да атқарады.
Күніне 15-20 шақыртуға барып, әрбір минуттың адам өмірін сақтап қалудағы маңызын терең түсінеді. Реанимациялық іс-шаралар кезінде өкпе-жүрек компрессиясына қатысып, бригада жұмысына қолдау көрсетеді.
Мұрат Егізбайұлы – жас мамандарға бағыт-бағдар беретін тәжірибелі тәлімгер. Ол жас жүргізушілерге өз тәжірибесін бөлісіп, олардың кәсіби шеберлігін шыңдауға көмектесіп келеді. Сондай-ақ, өз біліктілігін үнемі арттырып, «Жедел жәрдем көлігінде қауіпсіз көлік жүргізу техникасы» бойынша арнайы курстардан өтеді.
Әріптестері мен науқастарға құрмет көрсетіп, әрдайым көмек қолын созуға дайын тұратын Мұрат Егізбайұлы – медициналық жедел жәрдем қызметінде адал еңбегімен, жауапкершілігімен және жанашырлығымен ерекшеленетін ардақты маман. Оның еңбегі – адам өмірін сақтап қалуға бағытталған ізгі жол!