Шымкент қаласында Ұлы Жеңістің 80 жылдығына орай мазмұнды іс-шара ұйымдастырылды. Биылғы Ұлы жеңістің 80 жылдығына орай барлық жерде жеңіс үшін жанын қиған боздақтардың рухына тағзым етіліп, олардың ерлігін дәріптеуге арналған шаралар өтуде. Солардың бірі ерлікті еске алу, жастар санасына сіңіру мақсатында ұйымдастырылған ауқымды шара Шымкент қалалық саяси қуғын-сүргін құрбандары музейінің «Ерлік» бөлімі өткізді.
Бүгінде «Ерлік» бөлімінде Ұлы Отан соғысына қатысты 5000-нан астам жәдігер сақталған. Олардың қатарында жауынгерлердің тұтынған заттары, әскери киімдері, майданнан елге жазылған хаттар, орден-медальдар мен сирек құжаттар бар. Бұл жәдігерлер – сол бір қайғылы да қаһарман кезеңнің тірі куәсі ретінде сақтаулы.
Тағылымы мол шарада Ұлы Отан соғысы ардагері Асанов Қалмырзаның ұлы — ҚР «Мәдениет саласының үздігі», ҚР Журналистер одағының мүшесі, композитор Асанов Айжігіт Қалмырзаұлы мен ардагер Кәрібаев Баймаханның қызы Айымхан Баймаханқызы сөз сөйледі. Олар ел мен жер үшін жанын қиған әкелерінің ерлігі туралы әсерлі естеліктер айтып, жастарды елге қызмет етуге шақырды.
№138 жалпы орта мектебінің оқушылары патриоттық өлеңдерін оқып, әскери оркестр сүйемелдеуімен ән орындап, жиналғандардың ықыласына бөленді.
Сондай-ақ, «Ерлік» бөлімінің меңгерушісі Гүлзинат Джақсыбекова, кіші ғылыми қызметкер Айгүл Бердікұлова және «Семей – сынақ ядролық» полигоны қоғамдық бірлестігінің ардагерлері соңында Еңбекші аудандық әкімдігінің атынан аудан әкімі Д. Есілбектің алғыс хаттарымен марапатталды.
Ал іс-шара соңында «Семей – сынақ ядролық» полигоны ҚБ төрағасы Дәулбаев Қалжан Қалдыбайұлы бастаған ардагерлер қауымы ҰОС боздақтарының рухына арнап құран бағыштап, еске алу дастарханын жайды.
