Түркі мемлекеттері ұйымы бас хатшысының орынбасары Мерей Мұқажан маңғыстаулықтарды Ақтаудың «Түркі әлемінің мәдени астанасы» мәртебесін алуымен құттықтады.
Ол ұлттық киімді ұлықтаған Маңғыстау жұртының таяуда ғана Гиннесс рекордтар кітабына енгенін тілге тиек етіп, өңір осы уақытқа дейін тарих жазып келе жатқанын айтты. Сонымен қатар, ол дайындық өзі жоғары деңгейде жүріп жатқанын айтады.
— Ең алдымен киелі мекен Маңғыстаудың тұрғындарын Ақтаудың Түркі әлемінің мәдени астанасы болуымен шын жүректен құттықтаймын. Керемет дайындық болып жатыр.Тойдың боларынан боладысы қызық дегендей, осы үлкен шараның әзірлігіне куә болып жатырмыз. Өте жоғары деңгейде өтіп жатыр. Ақтаудың осындай мәртебе алып жатқанын қазақ азаматы ретінде мақтан тұтатамын. Түркі мемлекеттері ұйымы да тілектес, бұл біздің ортақ жобамыз. Осы уақытқа дейін Маңғыстау өңірі тарих жазып келе жатыр. Қазақтың ұлттық киімін дәріптеген маңғыстаулықтар жақында ғана Гиннесс рекордтар кітабына енді. Енді міне, Түркі әлемінің мәдени астанасы деген мәртебе алып жатыр. Осы киелі өңір, 362 әулиенің мекені дами берсін, өркендей берсін. Біз, Түркі әлемі әрқашан ниеттеспіз. Баршаңызға құт-береке, аманшылық тілеймін, — дейді Түркі мемлекеттері ұйымы бас хатшысының орынбасары Мерей Мұқажан.
Сондай-ақ Мерей Мұқажан ауқымды шараның ұйымдастыруға ұйытқы болған Маңғыстау облысының әкімдігіне, ҚР ақпарат және мәдениет министрлігіне, ТҮРКСОЙ халықаралық ұйымына алғысын білдірді.
