Шымкент қаласы Жастар ресурстық орталығының ұйымдастыруымен «Мейірім» апталығы аясында еріктілер «Аялы алақан» оңалту орталығына жиналып, ерекше балалар мен олардың ата-аналарына психологиялық тренинг өткізді.
Тренингтің мақсаты – жас өркеннің психо-эмоционалды жағдайын тұрақтандыру, өмірлік қиындықтармен күресу қабілетін арттыру, және қоғамдағы орнын табуға көмектесу болатын.
– Тренинг – ерекше балалардың психологиялық саулығын арттыруға бағытталған маңызды шара. Тренинг барысында сәл де болса баламен жұмыс жасауды үйрете алсақ, аналарына күйзелісті жеңудің тиімді әдістерін, эмоцияларын басқару жолдарын және ішкі үйлесімділікке қол жеткізуді үйретсек, сол арқылы олардың өмір сүру сапасын жақсартуға көмектессек соның өзі біз үшін нәтиже. Түрлі ойындар мен топтық жұмыс арқылы қарым-қатынас дағдыларын дамыту да олардың қоғамда өз орнын табуға ықпал етеді деп ойлаймыз, – дейді волонтерлармен жұмыс жүргізу бөлімінің басшысы Гүлбибі Құдайберген.
Тренингке оңалту орталығына келіп ем-дом алып жүрген балалар мен ата-аналары қатысты. Шара балалардың ерекшелігіне қарай ойын түрінде өтіп, соңында ұйымдастырушылар сыйлықтар үлестірді. Ұйымдастырушылардың айтуынша іс-шара жалғасын табады.
«Шымкент келбеті»
