Шымкент қаласындағы «Достық үйінде» қалалық ішкі саясат және жастар істері жөніндегі басқармасының қолдауымен және «Қоғамдық келісім» коммуналдық мемлекеттік мекемесінің ұйымдастыруымен «Ұлттық киім – ұрпаққа мұра» атты ерекше фестиваль өтті. Қазақстан халқы Ассамблеясының «Қазақтану» жобасы аясында өткізілген бұл іс-шара ұлттық киім тігу және зергерлік бұйымдар жасау өнерімен айналысатын жергілікті шеберлердің еңбегін дәріптеуге және жас ұрпақты ұлттық құндылықтарды қастерлеуге тәрбиелеуге бағытталды.
Фестиваль барысында ұлттық киімдер мен зергерлік бұйымдардың көрмесі ұйымдастырылды. Көрмеде жергілікті қолөнершілердің қазақтың ұлттық киімдері мен зергерлік өнер бұйымдарына негізделген туындылары көрерменге ұсынылды. Сонымен қатар, фестиваль қонақтарына «Достық үйінің» үлкен залында этностильдегі және заманауи сәндік киім үлгілерінің көрсетілімі ұсынылып, көрермендерге ұлттық киімнің даму тарихы мен оның заманауи трендтерге бейімделген үлгілері көрсетілді.
Шымкент қаласы ішкі саясат және жастар істері жөніндегі басқармасының басшысы Айгерім Жұмағұлова және «Қоғамдық келісім» мекемесінің басшысы Нұркен Әлімқұлов фестивальдің салтанатты ашылуында сөз сөйлеп, ұлттық мәдениеттің болашақ ұрпаққа мұра болып қалу маңыздылығын атап өтті. Айгерім Жұмағұлова: «Біздің мақсат – ұлттық киім тігумен және ұлттық нақышта зергерлік бұйымдар жасаумен айналысатын шымкенттік шеберлердің, суретші-дизайнерлердің туындыларын дәріптеу арқылы жалпыұлттық бірлік пен татулық құндылықтарын насихаттау», – деп, фестивальдің негізгі мақсатын түсіндірді. Бұл сөздер іс-шараның шынайы миссиясын көрсетті – ұлттық өнерді дәріптеу арқылы жастарға дәстүр мен мәдениеттің маңызды екендігін жеткізу.
Фестивальде көрермендерге Оңтүстік Қазақстан мемлекеттік педагогикалық университетінің «Ақ баян» сән театрының топтамасы, А.Исмаилов атындағы кәсіптік колледждің коллекциясы, Г.Еспай жетекшілік ететін «Ару аналар» топтамасы, №5 Жеңіл өнеркәсіп және сервис колледжінің, Ә.Қастеев атындағы өнер және дизайн колледжінің «Асыл мұра» топтамасы, Б.Жетібаева жетекшілік ететін «Асыл мұра» топтамасы, сондай-ақ Орталық Азия инновациялық университетінің «Сән» топтамасы ұсынылды. Әрбір топтама қазақтың ұлттық киімдерінің ерекшеліктерін сақтай отырып, заманауи сән мен этникалық элементтерді үйлестірген жаңашыл шешімдермен ерекшеленді. Бұл шығармашылық туындылар ұлттық киімдердің болашақта қалай дамитынын көрсетіп, оның әлемдік сән индустриясында да өз орнын табуға қабілетті екенін дәлелдеді.
Фестивальдің қорытындысында кәсіби мамандардан құралған қазылар алқасы жеңімпаздарды анықтап, ұлттық мәдениетті насихаттауда ерекше көзге түскен шеберлерді арнайы дипломдар және естелік сыйлықтармен марапаттады. Бұл марапаттар ұлттық киім өнерін дамытумен айналысатын шеберлердің еңбегін бағалаудың бір көрінісі болып табылады.
«Ұлттық киім – ұрпаққа мұра» фестивалі ұлттық мәдениеттің ажырамас бөлігі саналатын киім мен зергерлік өнерді дәріптеуге арналған ерекше мереке болды. Шымкент қаласында өткен бұл фестиваль қазақстандықтардың мәдени мұрасын сақтап, оны заманауи жастар арасында танымал етуге ықпал етеді. Бұл шара ұлттық өнердің көркеюіне және оны әлемдік деңгейде танытуға үлкен үлес қосары анық. Түрлі сәндік топтамалар мен жаңа дизайн шешімдері болашақта ұлттық киімдеріміздің халықаралық аренада кеңінен танымал болуына жол ашады.
