Әрбір мамандықтың қиындығымен қатар қызықты тұсының болары анық. Еңбек адамының ерен еңбегі мен әрбір жетістігі елеусіз қалмауы тиіс. Әр үздік нәтиже мен қиын жұмыстың астарында бір адамның үздіксіз қызметі мен маңдай тері жатыр. Бүгін сөз ететініміз — қоғамның тыныштығы мен жедел медициналық қызметтің тиімділігін қамтамасыз ететін жедел жәрдем көлігінің жүргізушісі Хайрат Ергебекұлы Сүйеубаев.
Хайрат аға жедел жәрдем көлігінің рөлінде отырумен қатар, науқастың өмірі мен денсаулығына жауапты адам. Шақырту түсе салысымен науқасқа баратын медициналық қызметкерлер де, оларды жеткізетін жүргізуші де дайын болуы керек. Көлік сақадай сай, техникалық жай-күйі мен мекенжайға уақытында жетуі де жүргізушіге байланысты. Алайда, рөлдегі адамның фельдшердің базалық жұмысынан хабардар болуы қажет. Шұғыл жағдайда фельдшерге көмек керек болса, жүргізуші қол ұшын созуға дайын болуы тиіс. Осылайша, жедел жәрдем көлігінің жүргізушісіне артылған жауапкершілік зор.
1967 жылы Оңтүстік Қазақстан облысы, Төлеби ауданы, Ақжар ауылында дүниеге келген Хайрат Ергебекұлы, «Еңбектің наны тәтті» деген ұстанымды жанына серік еткен. 1994 жылы жедел медициналық жәрдем көрсету станциясына жұмысқа тұрып, содан бері 30 жылдан астам уақыт бойы жедел жәрдем көлігін жүргізіп келеді. Отбасылы, екі баласы бар, әрі оларды тәрбиелеп, қоғамға пайдалы азамат етіп өсіруге тырысуда.
– «Жедел жәрдем жүргізушісі болып жұмысқа орналасу оңай емес. Оларға қойылған талап жоғары. Жүргізуші болып орналасқысы келетіндер қатал іріктеуден өтеді. Олар жол қозғалысы ережелерін, қаланың әр көшесін жіті білулері қажет. Қазіргі уақытта барлық жүргізушілер фельдшерлердің базалық білімін жетік біледі. Арнайы курстардан өттік. Дәрігерлер де сабақ өтіп тұрады», – дейді Хайрат аға.
Хайрат ағаның күнделікті жұмысы науқастардың өмірі мен денсаулығына қауіп төндірмей, оларды уақытында дәрігерлерге жеткізуге бағытталған. «Күн сайын әртүрлі диагнозы бар науқастармен кездесеміз. Кейде қиын жағдайлар да болады, бірақ мен үшін ең бастысы — науқастың аман-есен емделуіне көмек көрсету. Әр науқас менің тарапымнан жылулық пен түсіністікке ие болуы керек», — деп бөліседі ол.
Оның еңбегі мен жауапкершілігі арқасында жедел жәрдем қызметінің жұмысы оң нәтижеге жетуде. Хайрат аға жедел жәрдем қызметін өркендетуде белсенділік танытып, әріптестеріне қолдау көрсету арқылы ұйымшылдық атмосферасын қалыптастырады. «Хайрат аға — нағыз команда ойыншысы, оның көмек көрсетуі мен тәжірибесі әрдайым бағаланады», — дейді әріптестері.
Сондай-ақ, Хайраттың жетістіктері мен кәсіби дағдылары ұжымдағы жастарға үлгі болуда. Ол әрдайым жаңа бастаған мамандарға кеңес беріп, оларға жұмысқа деген ынтасын арттыру үшін қосымша ақпараттармен бөліседі.
Хайрат Ергебекұлы — жедел жәрдем көлігінің нағыз жүргізушісі, қоғамның сеніміне ие азамат. Оның еңбек жолы, адалдығы мен жауапкершілігі — жастарға үлгі. Ол тек өз жұмысының шебері ғана емес, сондай-ақ адамгершілік қасиеттері мол, науқастармен, олардың туыстарымен мейірімділікпен қарым-қатынас жасайтын тұлға. Хайраттың өмірі — адалдық, еңбекқорлық және жауапкершілік туралы бірден-бір үлгі. Оның мақсаты — науқастардың өмірін жақсарту, денсаулық сақтау саласына елеулі үлес қосу.
Хайрат Ергебекұлының еңбегі мен адалдығы қоғамдағы еңбек адамдарының қадірін арттыруға ықпал етеді. Оның тарихы — еңбек адамының нағыз келбеті, қоғамның гүлденуіне бағытталған маңызды қызметінің бір бөлшегі.
