Шымкент қаласында «Азаматтық ресурс орталығында» үкіметтік емес ұйымдар, сарапшылар және белсенді жастар жиналып, Мемлекет басшысының халыққа Жолдауының негізгі аспектілерін талқылады. Жиында азаматтық қоғамның рөлі мен халықтың белсенділігін арттыру, сондай-ақ үкіметтік емес ұйымдардың қоғамдағы орны туралы пікірлер ортаға салынды.
Басқосуда М.Әуезов атындағы Оңтүстік Қазақстан Университетінің проректоры, доцент Сәкен Мәжінбеков биылғы Жолдауда көтерілген әлеуметтік-экономикалық мәселелерге тоқталды. Ол геосаяси жағдайлардың экономикаға әсерін атап, инфляция деңгейінің 19 пайызға жеткенін мәлімдеді.
«Бұл жағдайды жеңілдету мақсатында ең төменгі еңбекақы 60 мың теңгеден 70 мың теңгеге көтерілетіні хабарланды. Бұл қадам, әрине, инфляциямен күресудің бір бөлігі», — деді Сәкен Мәжінбеков. Ол сондай-ақ, халықтың әлеуметтік жағдайын жақсарту үшін жергілікті билік пен азаматтық қоғамның ынтымақтастығының маңыздылығына
Проректордың пікірінше, жергілікті проблемаларды шешуде үкіметтік емес ұйымдардың рөлі айрықша. «Өзін-өзі басқару аясында шешілетін мәселелер өте көп. Жолдар, ауыз су, электр энергиясы сияқты мәселелер бойынша бюджеттен қаржы бөлінеді. Қоғамдық кеңестер мен қала мәслихаты депутаттары жұмыс істейді, алайда үкіметтік емес ұйымдар да халықтың мүддесін қорғап, инновациялық ұсыныстармен шығуы керек», — деді ол.
Жиын барысында «Қазақстан Әйелдері күштері Альянсы» қауымдастығының қаладағы филиалы жетекшісі Жаннета Жазықбаева да ұйымдардың халықпен тікелей байланысын арттыру, оларды әлеуметтік жобаларға тарту қажеттілігіне тоқталды. «Әйелдердің әлеуметтік-экономикалық мәртебесін көтеру, олардың кәсіпкерлік қабілеттерін дамыту, сонымен қатар гендерлік теңдікті қамтамасыз ету — бүгінгі таңда өзекті мәселе», — деді ол.
Жолдаудағы тапсырмалардың айқындылығы мен нақты шешімдерді талап етуі барлық тарапқа бірлесіп жұмыс істеу міндетін жүктейді. Жиналғандар бірлескен жобалар мен бастамаларды жүзеге асыру үшін ортақ жұмыс механизмдерін қалыптастыру қажеттігін атап өтті.
«Біз мемлекеттік органдармен серіктестік қарым-қатынасты нығайту арқылы азаматтық қоғамның белсенділігін арттыра аламыз. Үкіметтік емес ұйымдар халықтың мүддесін қорғау, олардың құқықтарын қорғау және әлеуметтік мәселелерді шешу үшін маңызды рөл атқарады», — деді Шымкент қаласы бойынша Азаматтық Альянс заңды тұлғалар бірлестігінің төрағасы Жұмағали Білісбеков.
Форумда жастардың рөлін ерекше атап өтті. Оңтүстік Қазақстан педагогикалық университетінің ректоры Гүлжан Сүгірбаева жастарды қоғамдық белсенділікке шақырып, олардың өз дауыстарын білдіруі маңызды екенін айтты. «Болашақ — жастардың қолында. Олар еліміздің саяси, экономикалық және әлеуметтік өмірінде белсенді рөл атқаруы керек», — деді ол.
Жиын қорытындысында, үкіметтік емес ұйымдар мен қоғамдық институттардың халықтың қажеттіліктеріне жауап беруі, мемлекеттік органдармен серіктестік қарым-қатынасты нығайтуы, сондай-ақ әлеуметтік мәселелерді шешу үшін бірлескен күш-жігер жұмсау керектігі айтылды.
Сонымен қатар, қатысушылар азаматтық қоғамның белсенділігін арттырудың маңыздылығын атап, қоғамның барлық топтарының қатысуын қамтамасыз етудің жолдарын іздестіруге дайын екендерін білдірді.
Осылайша, Шымкенттегі бұл форум мемлекеттік саясатты жүзеге асырудағы азаматтық қоғамның рөлін күшейтуге бағытталған маңызды қадам болды, әрі болашақта осы бағыттағы жұмыстың жалғасуына негіз қалады.
