Полиция қызметкерлеріне асығыстыққа жол беруге болмайды, кез келген әрекетте ұқыптылық пен тапқырлық қажет. Ол үшін сақадай сай болу, жылдамдық және қай уақытта болсын ауа райының түрлі құбылысына қарамай шақыртулар мен түрлі оқыс оқиғаларға баруға дайын тұратын даярлық қажет. Мүлт кеткен қателік кейде орны толмас өкінішке алып келетіні белгілі. Ал осындайда алаштың ардақтысы Әлихан Бөкейханов «Ұлтқа қызмет ету білімнен емес, мінезден» дегендей қырағы полицияның қысылтаяң уақытта батыл әрекет, оңтайлы шешім қабылдай алатындығы қауіпсіздікті біршама сейілтеді.
Мұны айтуымызға себеп патрульдік полиция батальонының инспекторлары Дәулет Сағынбаев пен Нұрғали Сапарханның жас жігітті ажалдан арашалап қалған оқиғасы. Республикалық маңызы бар «Сарыағаш-Жетісай-Жібек Жолы» тас жолының 155-130 шақырымында кезекшілікке түскен полицейлер, күндізгі уақытта жол бойында адамдардың көмек сұрап тұрғанын байқайды.
Тәртіп сақшылары мән-жайды анықтағанында, Сырдария өзенінде ағып бара жатқан адамды көреді. Еш ойланбастан көмектесуге кіріскен полицей Д.Сағынбаев суға секіріп түсіп, батып бара жатқан азаматқа жақындайды. Содан әріптесі Н.Сапархан екеуі ер адамды сүйреп, жағаға алып шығады.
Белгілі болғандай, Мақтаарал ауданының тұрғыны мал бағып жүріп, құлынның өзенге түсіп кеткенін байқайды. Малын құтқарамын деп суға түсіп, соңында өзі шыға алмай қалған. Қазіргі таңда полицейлердің жылдам әрекеті арқасында аман қалған тұрғынның жағдайы қалыпты. Олардың антына адал болып, қызметін мінсіз атқарып жүрген полиция сақшыларының ерлікке толы жұмысы жастарға үлгі.
