Апат айтып келмейді. Сол үшін сақ жүрген жөн. Дегенмен, кенет үйден өрт шықса оқиға орнына алғаш жететін полиция қажет болса өрт сөндірушінің де қызметін атқарып кететін жағдайлар кездеседі. Яғни, алғашқы әрекет шұғыл керек болғанда көзсіз ерлікке баруға тура келеді. Өйткені адам өміріне араша болу таңдауы тұр. Ондай кезде өрт сөндірушілердің келуін күтіп тұруға дәті шыдамайтын, қайтпас та қайсар полиция қызметкерлері талай қайғылы оқиғаның алдын алып қысылтаяң уақытта оңтайлы шешiм қабылдай бiлетiн мамандар. Сондықтан бұл қызметке кездейсоқ адам келе бермейдi.
Түркістан облысы полиция департаментінің жылдам қимылдайтын арнайы жасақ қызметкерлерінің қырағылығының арқасында Сайрам ауданындағы үйдің ауласында болған өртті сөндіруге мүмкіндік туды. Яғни таңғы сағат 10.00 шамасында, тәртіп пен қоғамдық қауіпсіздікті қамтамасыз ету қызметін атқару кезінде полицейлер жергілікті тұрғынның үйінің ауласынан шыққан түтінді байқайды.
Тәртіп сақшылары дереу өрт сөндірушілерді шақырып, оқиға орнына өздері келді. Мұнда олар малға арналған екі қабатты ғимараттың шатырында шөп өртеніп жатқанын анықтады. 4 полиция қызметкері өрттің одан әрі таралуын болдырмау үшін оны дереу сөндіруге кірісті. Су мен қолға түскен құралдар көмегімен және өрт сөндірушілермен бірге олар өртті тез арада сөндірді.
Осылайша, жедел және ұйымдасқан әрекеттердің арқасында ауыл тұрғынының үйіне жалын тимеді. Өрттен ешкім зардап шекпеді. Үй иесі яғни жергілікті тұрғын өзінің шынайы алғысын білдірді.
Негізі, тілсіз жаудың тұтануына адамдар себеп болады. Отты дұрыс қолданбау, электр сымдарының ақауы, үйде өртке қауіпті заттарды сақтау. Десе де, қауіпсіздік ережесін үлкен-кіші түгел сақтағаны жөн. Ал өжет полицейді ісі ел есінде сақталатыны сөзсіз.
