Шымкент қаласында халықты тұрғын үймен қамтамасыз ету және азаматтардың баспанаға қолжетімділігін арттыру бағытындағы мемлекеттік саясат кезең-кезеңімен жүзеге асырылып келеді. Қалада тұрғын үй құрылысының көлемін ұлғайту, әлеуметтік осал санаттағы азаматтарды қолдау және тұрғын үй кезегінде тұрған отбасылардың мәселесін шешу бойынша жүйелі жұмыстар жүргізілуде.
Осы бағыттағы жұмыстардың нәтижесінде бүгін «Көрме» орталығында кезекті тұрғын үй кілттерін табыстау рәсімі өтті. Салтанатты шара барысында 30 отбасы жаңа баспананың иесі атанды. Іс-шараға Шымкент қаласының әкімі Ғабит Сыздықбеков қатысып, қоныс иелерін қуанышты оқиғамен құттықтады.
Жаңа пәтерлер Ақжайық шағынауданында орналасқан заманауи көпқабатты тұрғын үйлерден берілді. Баспаналар мемлекеттік тұрғын үй бағдарламалары мен «Отбасы банкі» арқылы жүзеге асырылатын жеңілдетілген ипотекалық тетіктер аясында ұсынылды. Бұл бағдарламалар тұрғындардың тұрғын үй сатып алу мүмкіндігін кеңейтіп, қолжетімді несие құралдары арқылы баспаналы болуына жағдай жасап келеді.
Пәтер иелері заңнама талаптарына сәйкес анықталды. Олар «Отбасы банкі» АҚ арқылы жүзеге асырылатын «2-10-20» және «5-10-20» тұрғын үй бағдарламаларына қатысып, төлем қабілеттілігін растаған азаматтар қатарынан іріктелген. Бағдарламалардың басты мақсаты – тұрғын үйге мұқтаж азаматтарды қолдау және олардың әлеуметтік жағдайын жақсарту.
Баспана алғандардың қатарында көпбалалы отбасылар, толық емес отбасылар, ерекше қажеттілігі бар балаларды тәрбиелеп отырған ата-аналар, мүгедектігі бар азаматтар және бюджет саласының қызметкерлері бар. Бұл санаттағы азаматтарды тұрғын үймен қамтамасыз ету мемлекет жүргізіп отырған әлеуметтік саясаттың маңызды бағыттарының бірі болып саналады.
Айта кету керек, Ақжайық шағынауданындағы тұрғын үйлер барлық құрылыс талаптары мен заманауи стандарттарға сәйкес салынған. Үйлер қажетті инженерлік-коммуникациялық инфрақұрылыммен толық қамтамасыз етілген. Атап айтқанда, ауыз су, электр қуаты, табиғи газ, кәріз жүйесі және абаттандырылған аула аумақтары қарастырылған. Сонымен қатар балалар ойын алаңдары, демалыс орындары және автотұрақтар тұрғындардың жайлы өмір сүруіне қолайлы жағдай жасайды.
Соңғы жылдары Шымкентте тұрғын үй құрылысының қарқыны айтарлықтай артты. Қалада жаңа шағынаудандар қалыптасып, тұрғын үй қоры тұрақты түрде кеңейіп келеді. Бұл өз кезегінде тұрғын үй кезегінде тұрған азаматтардың санын азайтуға және халықтың өмір сүру сапасын арттыруға мүмкіндік береді.
Алдағы уақытта да қалада мемлекеттік тұрғын үй бағдарламаларын іске асыру жалғасады. Жаңа тұрғын үйлердің құрылысы жүргізіліп, баспанаға мұқтаж азаматтарды тұрғын үймен қамтамасыз ету бағытындағы жұмыстар жүйелі түрде жүзеге асырылатын болады.
Тұрғындарды қолжетімді баспанамен қамтамасыз ету – халықтың әл-ауқатын арттыруға, әлеуметтік тұрақтылықты нығайтуға және жайлы қалалық орта қалыптастыруға бағытталған маңызды міндеттердің бірі болып қала береді.
