Шымкент қалалық мәслихатында «AMANAT» партиясы депутаттық фракциясының кезекті отырысы өтті. Жиынға «AMANAT» партиясы қалалық филиалы атқарушы хатшысының орынбасары Ербол Байқонысов, фракция жетекшісі Талғат Балтабаев және фракция мүшелері қатысты.
Күн тәртібінде партияның сайлауалды бағдарламасында белгіленген міндеттердің орындалу барысы қаралды. Әсіресе, жүзеге асырылу мерзімі жақындап қалған және орындалмай қалу қаупі бар нысандар бойынша нақты шаралар қабылдау мәселесі талқыланды.
Фракция мүшелері жауапты басқармалармен бірлесіп, әрбір жобаны жеке пысықтау, туындаған кедергілерді анықтау және оларды шешудің нақты тетіктерін қарастыру қажеттігін атап өтті.
Жиын барысында сөз алған Ербол Байқонысов партия бағдарламасы – тек құжат жүзіндегі міндет емес, тұрғындарға берілген нақты уәде екенін айтты.
– Сайлауалды бағдарламада көрсетілген әр тармақ – халық алдындағы жауапкершілік. Сондықтан әр нысанның орындалуы біздің тұрақты бақылауымызда болуы керек. Егер қандай да бір кедергі болса, оны уақытында анықтап, шешу жолдарын бірлесіп қарастыруымыз қажет, – деді ол.
Ал фракция жетекшісі Талғат Балтабаев атқарушы органдармен өзара үйлесімді жұмыс істеудің маңыздылығына тоқталды.
– Басты мақсат – мәселені кейінге қалдырмай, нақты нәтижеге қол жеткізу. Орындалмай қалу қаупі бар жобаларды алдын ала талдап, тиісті басқармалармен бірге тиімді шешім қабылдауымыз керек. Бұл – депутаттық корпустың негізгі міндеттерінің бірі, – деді ол.
Отырыс қорытындысында жауапты тұлғаларға нақты тапсырмалар беріліп, бірқатар нысандар бойынша қосымша жұмыс кездесулерін өткізу жоспарланды. Фракция алдағы уақытта да сайлауалды бағдарламаның орындалу барысын жүйелі түрде бақылауда ұстайтын болады.
#AMANAT
