Бүгін Шымкент қаласында әлеуметтік маңызы бар азық-түлік тауарларының бағасын тұрақтандыру және инфляция деңгейін төмендету мақсатында ауқымды жұмыс жүргізілді. Қала әкімдігі мен кәсіпкерлік субъектілері арасында 100-ден астам өзара ынтымақтастық туралы меморандумға қол қойылды. Бұл құжаттар ұзақ мерзімді әріптестікті көздеп, нарықтағы баға тұрақтылығын қамтамасыз етуге бағытталған.
Бағаны тұрақтандыру бастамасына «Грамад», «F-Mart» секілді ірі сауда желілері, қаланың негізгі азық-түлік базарлары, ұн тарту комбинаттары, ет және сүт өңдеу кәсіпорындары, жұмыртқа, өсімдік майы, нан-тоқаш өнімдерінің өндірушілері және көтерме жеткізушілер кең көлемде атсалысты. Осылайша, меморандумға қатысушылар тізімі қаланың барлық негізгі сауда инфрақұрылымын қамтып отыр.
Қала әкімінің бірінші орынбасары Айдын Кәрімовтың айтуынша, бұл шара бір күндік акция емес, керісінше, әкімдік пен бизнес қауымдастығының бірнеше жыл бойы жүргізіп келе жатқан жүйелі жұмысының жалғасы саналады.
«Бизнес өкілдері өздерінің жоғары әлеуметтік жауапкершілігін тағы да көрсетті. Бүгінгі келісімдер — тұрғындарға тиімді баға ұсыну, нарықтағы ашықтықты сақтау және негізгі азық-түлік өнімдерінің қолжетімділігін қамтамасыз ету жолындағы ортақ қадамымыз. Мұндай ынтымақтастық нақты нәтижелер беріп, нарықтағы кез келген өзгерісті жедел бақылауға, соған сәйкес тез әрекет етуге мүмкіндік береді», – деді А.Кәрімов.
Меморандум аясында тараптар делдалдық тізбектерді қысқарту, бағаны негізсіз өсірмеу, тасымалдау және логистика шығындарын оңтайландыру, сондай-ақ инфляциялық қысымды төмендетуге бағытталған бірқатар шараларды бірлесіп жүзеге асыруға келісті. Бұл – ішкі нарықты тұрақтандыруға тікелей оң ықпал ететін маңызды қадам.
Баға тұрақтылығы тұрғындардың әлеуметтік әл-ауқатының негізі болғандықтан, қала әкімдігі бұл бағыттағы жұмысты күн сайын мониторинг жүргізу арқылы жалғастырып келеді. Мамандар азық-түлік сатылатын барлық негізгі нүктелерде баға өзгерісін қадағалап, кәсіпкерлермен тікелей байланыста әрекет етеді. Қажет жағдайда жедел шаралар қабылданып, нарықтағы теңгерімді сақтау тетіктері іске қосылады.
Бұл бастама Шымкент қаласының азық-түлік қауіпсіздігін қамтамасыз ету, халықтың тұрмыс сапасын жақсарту және жалпы әлеуметтік-экономикалық тұрақтылықты нығайтуға бағытталған кешенді саясаттың бір бөлігі. Қала билігі алдағы уақытта да бизнес өкілдерімен ашық диалог пен ынтымақтастықты жалғастыруға ниетті.
