Шымкент қаласында инженерлік инфрақұрылым жүйесін жаңарту бағытындағы жұмыстар қарқын алды. Бүгінгі таңда мегаполисте тұрғындарды сапалы ауыз сумен және кәріз жүйесімен қамтамасыз ету мәселесі мемлекеттік деңгейде шешімін табуда. Бұл бастама 2021–2025 жылдарға арналған кешенді инвестициялық бағдарламаның негізінде жүзеге асып жатыр. Бағдарламаның жалпы құны 750 миллион теңгеден асады, ал биылдың өзінде 110 миллион теңге көлеміндегі қаражат су жүйесін жаңартуға бағытталған.
Қала халқының саны жыл сайын артып келеді, жаңа шағын аудандар бой көтеріп, тұрғын үй құрылысы қарқын алған сайын, ауыз суға деген сұраныс та еселеніп отыр. Осыған байланысты, қала әкімдігі мен «Су құбыры және канализация басқармасы» кәсіпорны инженерлік желілерді толық жаңғырту жұмыстарын қолға алған. Қазіргі таңда Достық, Исраилов, Далабазар көшелерінде және Шанырақ, Ұлағат шағын аудандарында жаңа су құбырлары тартылып, ескі магистральдар ауыстырылды. Сонымен қатар, насос жабдықтары жаңартылып, сорғы стансаларының электр жүйелері толық қайта жасақталды.
Бозарық, Самал-3, Асар-2 және Жиделі сияқты тұрғын аймақтарда да ауқымды жұмыс жүргізілді. Мысалы, Асар-2-де 630 миллиметрлік ескі құбырлар 450 миллиметрлік жаңа жүйеге ауыстырылып, судың қысымын тұрақтандыруға мүмкіндік берді. Жиделіде де ұқсас жаңарту жұмыстары жасалып, құдықтар орнатылды. Бұл жаңғырту судың сапасын арттырып қана қоймай, апатты жағдайлардың алдын алуға мүмкіндік береді.
Кәріз жүйесі де назардан тыс қалған жоқ. Қайтпас және Тұран аудандарында жаңа желілер тартылып, «Нұрсат» стансасы өздігінен ағатын жүйеге қосылды. Мұндай жаңашыл тәсілдер электр энергиясын үнемдеп, жүйенің тиімділігін арттыруға септігін тигізеді. Мамандардың мәліметінше, соңғы екі жылда апаттар саны 10 пайызға азайған, ал судың ысырап деңгейі 8,65-тен 8,44 пайызға дейін төмендеген.
Инвестициялық бағдарламаның табысты жүзеге асуы коммуналдық қызмет сапасын арттыруға ғана емес, экологиялық тепе-теңдікті сақтауға да ықпал етті. Су жүйесіндегі тозу деңгейі азайып, энергия үнемдеу көрсеткіші жоғарылады. «Су құбыры және канализация басқармасы» МКК басшысы Бағдат Сырлыбайұлының айтуынша, мекеме 2025 жылға арналған жоспарды 99 пайызға орындап отыр.
«Біздің басты мақсатымыз – судың үздіксіз берілуін қамтамасыз ету. Биыл төрт ірі су алу және тарату нысанын жаңғырттық. Қауіпсіздік талаптарын күшейтіп, бейнебақылау орнаттық. Бұрын насос стансалары электр қуатына тәуелді болса, енді төрт кәріз стансасы өздігінен ағатын жүйеге ауыстырылды. Бұл электр энергиясын үнемдеп, техникалық шығындарды азайтады», – дейді ол.
Жаңғырту шаралары нәтижесінде Шымкент қаласының тұрғындарына сапалы, үздіксіз ауыз су жеткізіледі. Бұл тек техникалық жетістік емес, әлеуметтік маңызы зор қадам. Себебі таза су – қала өмірінің өзегі. Осындай кешенді жаңартулар Шымкентті заманауи және тұрақты дамып келе жатқан мегаполиске айналдырудың нақты дәлелі болып отыр.
