Шымкент қаласында Қазақстан халқы Ассамблеясының 30 жылдығына орай **«Медиация – татулық тірегі»** атты форум өтті. Іс-шараның негізгі мақсаты – ел ішіндегі бірлік пен келісімді сақтау, қоғамдағы тұрақтылықты нығайту, сондай-ақ этносаралық түсіністік пен сыйластық мәдениетін дамыту болды.
Форумға Қазақстан Республикасы Президентінің жанындағы Мемлекеттік басқару академиясының Абай облысы бойынша филиалының директоры **Әсет Абжақов**, академияның өкілі **Гүлжан Қожақметова**, Шымкент қаласындағы этномәдени бірлестіктердің жетекшілері мен мүшелері, сондай-ақ сертификатталған медиаторлар қатысты.
Жиында медиация институтының қоғамдағы рөлі мен маңызы талқыланып, тәжірибе алмасу алаңы ұйымдастырылды. Сарапшылардың пікірінше, медиация – дауласушы тараптарды сотқа жеткізбей, өзара келісімге келудің ең тиімді және өркениетті құқықтық жолы. Бұл тәсіл қоғамдағы түсіністік пен татулықты арттырып, азаматтардың құқықтық мәдениетін дамытуға ықпал етеді.
2011 жылы қабылданған «Медиация туралы» заң елімізде бейбітшілік пен келісім мәдениетін орнықтыруға зор мүмкіндік берді. Ал соңғы жылдары Шымкент қаласында этно-медиация бағыты белсенді дамып келеді. Өткен жылдан бастап мұнда **Этно-медиация орталығы** құрылып, этномәдени бірлестіктер жанынан медиаторлар қызметі жолға қойылған. Олар қоғамдағы түрлі келіспеушіліктер мен тұрмыстық дауларды бейбіт жолмен шешуге атсалысып келеді.
Шымкент қаласы Қазақстан халқы Ассамблеясы төрағасының орынбасары **Тахирбек Нишанбаев** форум барысында сөз алып, былай деді:
– Қай дәуірде, қай қоғамда өмір сүрсек те, ең маңыздысы – өзара бірлік пен келісімді сақтау. Өркениетті елдің іргетасы – заң, тұғыры – әділдік. Медиацияның басты мақсаты – дауласушы тараптарды өзара түсіністікке жеткізу. Бүгінгі форум осы бағыттағы жұмысты жүйелеуге, этно-медиация институтының әлеуетін арттыруға арналған. Біздің міндетіміз – медиаторлардың беделін көтеріп, қоғамда бейбітшілік пен татулық мәдениетін нығайту. Бұл – тұрақтылық пен ел бірлігінің берік кепілі, – деді ол.
Форум аясында медиаторлардың кәсіби біліктілігін арттыру, келіссөз жүргізу мәдениетін жетілдіру, этно-медиацияның тәжірибесін кеңейту мәселелері кеңінен талқыланды. Сондай-ақ, қоғамда дау-дамайдың алдын алу және өзара сыйластыққа негізделген қатынасты қалыптастыру бойынша ұсыныстар айтылды.
Кездесу соңында қатысушылар медиация институтын дамытуға бағытталған ұсыныстар пакетін әзірлеп, мемлекеттік органдар мен азаматтық қоғам арасындағы серіктестікті нығайту жөнінде пікір алмасты.
Форум татулық пен түсіністікке үндейтін маңызды алаң ретінде бағаланып, медиация мәдениетінің қоғамдағы орны айқындала түсті.
