Шымкент қаласының денсаулық сақтау саласы жыл сайын дамып, заманауи деңгейге көтерілу үстінде. Соңғы жылдары мегаполистегі медициналық ұйымдар жоғары технологиялық жабдықтармен толықтырылып, отандық мамандардың кәсіби біліктілігі артуда. Соның нәтижесінде бұрын тек астана мен ірі мегаполистерде жасалатын аса күрделі операциялар енді Шымкенттің өзінде сәтті орындалып келеді.
Жуырда қаладағы жетекші нейрохирургиялық бөлімшеде 1959 жылы туған ер адамға ауқымды әрі күрделі ота жасалды. Пациент ұзақ уақыт бойы тұрақты бас ауруы, құрысу ұстамалары және неврологиялық белгілердің салдарынан өмір сапасының төмендеуін бастан өткерген. Диагностикалық тексерулердің нәтижесінде миында үлкен көлемді ісік бары анықталды.
Күрделі операцияны тәжірибелі нейрохирург, жоғары санатты дәрігер **Кульмирзаев Марат Абдурашитович** бастаған білікті мамандар тобы жүзеге асырды. Бірнеше сағатқа созылған отаның әр кезеңінде жаңа заманауи медициналық жабдықтар мен инновациялық әдістер қолданылды. Нәтижесінде ми тіндерін барынша сақтап қалу арқылы ісік сәтті алынды.
Операциядан кейін науқас есін жиып, жалпы палатаға ауыстырылды. Дәрігерлердің айтуынша, жағдайы тұрақты, оңалу кезеңі жоспарлы түрде өтуде. Бұл – шымкенттік медицина қызметкерлерінің кәсібилігі мен денсаулық сақтау саласына енгізілген жаңа технологиялардың үйлесімділігінің айқын дәлелі.
Бүгінгі таңда Шымкентте нейрохирургия саласы жаңа белеске көтерілді. Қала тұрғындары ауыр диагнозбен еліміздің басқа мегаполистеріне сабылмай-ақ, өз өңірінде жоғары мамандандырылған көмекті ала алады. Бұл, бір жағынан, халықтың уақытын және қаржысын үнемдесе, екінші жағынан, жергілікті медицинаның әлеуетін нығайтады.
Мамандардың айтуынша, мұндай күрделі операциялардың аймақта жасалуы денсаулық сақтау саласының дамып келе жатқанын, кадрлардың кәсібилігін және заманауи медициналық инфрақұрылымның қолжетімді екенін көрсетеді. Одан бөлек, отандық дәрігерлердің халықаралық стандарттарға сәйкес қызмет көрсетуге қабілетті екендігін дәлелдейді.
Шымкент қаласының әкімдігі мен Денсаулық сақтау басқармасы медициналық қызметтің сапасын арттыруды басты назарда ұстап келеді. Соңғы жылдары жаңа ауруханалар мен емханалар іске қосылып, қымбат медициналық жабдықтар сатып алынуда, білікті мамандарды даярлау бағытында арнайы бағдарламалар жүзеге асырылуда.
Күрделі нейрохирургиялық оталардың өңірде сәтті жасалуы – шымкенттіктер үшін зор мүмкіндік әрі жергілікті медицинаның жаңа жетістігі. Бұл бастама алдағы уақытта өңірдің медициналық туризмін дамытуға да ықпал етпек.
