Билік пен заң өкілі – полиция қызметкері кәсіби қызметінде немқұрайдылыққа, ұқыпсыздыққа, білімсіздікке бой алдырмауы тиіс. Адамгершілік тұрғыдан оның қателіктерге жол беруге қақысы жоқ. Полиция қызметкерінің мінез-құлқы адамгершіліктің талабына сай болуы шарт. Өйткені ол – Қазақстан Республикасының халқына құқықтық қызмет көрсетуші тұлға. Олай етпейінше, полиция қызметкерінің қоғамдағы салмағы кеміп, беделі мен абыройына нұқсан келері қақ.
Полиция өкілі өзіне артылған сенімді ақтауда алдымен патриоттық сезімді, әділеттілікті, абыройлы болуды негізгі ұстаным етіп алуы қажет. «Мен елім мен азаматтардың нағыз қорғаушысы боламын, кез келген әділетсіздікке қарсы тұратын адал және сенімді полицей боламын, өз борышымды абыроймен орындаймын» деген ойды санаға әбден сіңіріп, халықтың жағдайына бей-жай қарамайтын, қауіпсіздігіне шынайы алаңдап, оны өзінің азаматтық борышым деп санайтын полиция қызметкерлері арамызда аз емес.
Түркістан облысы Бәйдібек ауданының учаскелік полиция инспекторлары түнгі кезекшілік жұмысын аяқтап, үйіне қайтып бара жатқанда жергілікті тұрғын қоңырау шалады. Әйел адам үйінде қалған 19 жастағы ұлымен байланыса алмай отырғанын айтып, көмек сұрайды.
Сақшылар тез арада оқиға орнына жетіп, пәтер есігін қағып, қоңырау соғады. Сақшылардың сақтығы сонша, үйдің ішінен ұялы телефонның шырылын естиді. Сақшылар іште адам барын түсініп есікті күшпен ашады. Үйге кіріп ес-түссіз жатқан жігітті жедел түрде қызметтік көлікпен орталық ауруханаға жеткізді.
Белгілі болғандай, желдің салдарынан газ жүйесіне ақау келіп көгілдір отын үйге тараған. Қазіргі таңда зардап шеккен жігіттің жағдайы тұрақты және дәрігерлер бақылауында. Ал оқыс жағдай орын алғанда жедел түрде әрекет еткен учаскелік полиция инспекторларына ананың алғысы шексіз. Осылайша жедел қимылдың арқасында бір отбасының азаматы аман қалды.
Осы ретте талайларды тәубесіне келтіріп жатқан – полицей, қауіп-қатердің ортасында жүретін – полицей, қылмыскерден қорғайтын – полицей, әлсізге зорлық қылдырмайтын – полицей деп олардың ерен еңбегіне қалайша тәнті болмайсың. Расында, полицияның міндеті – халықтың қорғаны болу.
